لأول مرة.. محمد عبد المنصف يكشف سبب غضب ممدوح عباس من مجلس إدارة الزمالك! فيديو

أكد محمد عبد المنصف، حارس مرمى الزمالك السابق، إن غياب ممدوح عباس، رئيس النادي الأسبق، عن الساحة في الفترة الحالية، أثار تساؤلات كثيرة بين جماهير الزمالك، خصوصًا في ظل الأزمة المالية الصعبة اللي بيعاني منها النادي، وعدم وجود دعم واضح من رجاله السابقين لحلها.

وقال عبد المنصف في تصريحاته عبر برنامج “اللعيب” على قناة MBC مصر: “ليه ممدوح عباس مش ظاهر دلوقتي عشان يحل أزمة الزمالك؟ خليني أقولك حاجتين، أولًا المجلس اعتمد من البداية على رجال أعمال، وفي الآخر كانوا متعودين إن الأستاذ ممدوح هو اللي بيتدخل في أي مشكلة ويحلهالك، فالدنيا بقت سهلة بالنسبالهم.”

وتابع: “لكن دلوقتي الوضع اتغير، الأستاذ ممدوح مش موجود زي الأول، أو ممكن يكون فيه خلافات في وجهات النظر بينه وبين بعض الناس في المجلس، أو حتى بيواجه مشكلة صحية – ربنا يشفيه – عشان هو طول الوقت تعبان، وبالتالي الباب ده اتقفل، والمجلس لازم يتحرك بنفسه ويحل مشاكله من غير ما يستنى حد.”

وأضاف عبد المنصف: “الخلافات بين ممدوح عباس والمجلس موجودة فعلًا، وفيه حاجات بتحصل في الكواليس بتعمل اعتراضات على بعض الاختيارات، سواء في التعاقد مع اللعيبة أو في الفكر الجديد اللي النادي ماشي عليه.”

وبسؤاله عن تدخل ممدوح عباس في اختيار اللاعبين، قال عبد المنصف: “آه، هو فعلاً كان بيدفع فلوس وبيقولهم: دول الاتنين السوبر اللي وعدت الجماهير بيهم، اتفضلوا الفلوس اهي، روحوا جيبوهم. يعني هو اللي كان بيوجه الأمور.”

وأكمل: “بس المشكلة إنه لما بيشوف أداء اللعيبة بعد التعاقد، بيلاقيهم مش بالمستوى اللي كان متخيله، فبيتضايق، ويقول مش دول اللي كنت متوقعهم، وكان شايف إن في لعيبة تانية ممكن تقدم أكتر من كده. فده بيزعلوا، فيبدأ يبعد شوية ويغضب من القرارات اللي بتتاخد.”

وقال: “أنا بقول لمجلس الإدارة الحالي، بلاش تعتمدوا دايمًا على ممدوح عباس أو غيره. الراجل وقف معاكم كتير، وكمان عمر الجنايني وجمال العدل وغيرهم، بس خلاص، لازم تواجهوا الأزمة دي بنفسكم. المشكلة مش في الإدارة ولا في الفنيات، دي أزمة مالية خالصة.”

واختتم عبد المنصف: “السنة دي كانت فرصة كبيرة جدًا، الأهلي إدانا فرصة مش هتتكرر إننا نبدأ الموسم بشكل مفاجئ، لكن الزمالك للأسف ما استغلهاش بالشكل اللي كان المفروض.”