كشف محمد أبو العلا، نجم الزمالك السابق، عن تطورات إيجابية داخل القلعة البيضاء خلال الفترة الحالية، مؤكدًا أن مجلس إدارة النادي نجح في صرف مستحقات جميع لاعبي الفريق الأول، رغم الظروف المالية الصعبة التي يمر بها النادي.
وقال أبو العلا عبر قناة الزمالك:
“أقدر أقول لجمهور الزمالك النهارده إن في بشرى خير حقيقية، مجلس الإدارة صرف مستحقات اللاعبين بالكامل والحمد لله قدر يوفر المطلوب علشان نقفل الملف ده تمامًا”.
وأضاف:
“الزمالك دايمًا لما بيكون عنده أزمة مالية بتتعمل عليها عناوين كبيرة جدًا، لكن لما النادي ينجح في الوفاء بالتزاماته تلاقي الخبر صغير ومش بيتكلم عنه حد. وده في رأيي إنجاز لازم يتسلط عليه الضوء، لأنك بتتكلم عن إدارة قدرت تدفع رغم الديون والأرض المسحوبة والغرامات اللي على النادي”.
وتابع:
“مجلس الإدارة الحالي بيحاول يخفف من الأعباء والديون، وبيشتغل في ظروف مستحيلة تقريبًا، ورغم كده النادي قادر يعيش وينافس وبيحقق بطولات. وده سر عظمة نادي الزمالك وجماهيره اللي عمرها ما فقدت الأمل”.
وأوضح أبو العلا:
“صرف المستحقات خطوة مهمة جدًا ولازم يكون ليها تأثير إيجابي على اللاعبين نفسيًا، لأن اللاعب المحترف لازم يحس بالاستقرار علشان يقدر يدي كل اللي عنده في الملعب، خصوصًا إن عندنا محترفين أجانب لازم نحافظ على صورتنا قدامهم”.
واختتم حديثه قائلًا:
“أنا شايف إن الخطوة دي بداية مرحلة جديدة، ووقف نزيف الأزمات اللي كان بيحصل قبل كده. وبإذن الله لما الأوضاع تبقى طبيعية، الزمالك هيكون في مكانة أكبر بكتير، سواء في الدوري أو في السوبر المصري اللي جاي”.
