أكد محمد صبري، نجم الزمالك السابق، أن أزمة نبيل عماد “دونجا” تم تضخيمها بشكل مبالغ فيه، مشيرًا إلى أنها لم تكن موجودة من الأساس لولا تأخر اتحاد الكرة في الرد على استفسار الزمالك الرسمي.
وقال صبري عبر قناة نادي الزمالك: “تم صناعة أزمة من لا شيء لتشتيت الفريق بسبب دونجا، القصة كلها إن الزمالك كان بيحضر أوراق البعثة اللي هتسافر، والناس في النادي ملقوش أي مستند رسمي يثبت إن في قرار إيقاف ضد دونجا، ورغم كده بعتوا استفسار رسمي لاتحاد الكرة من أسبوعين”.
وأضاف: “اتحاد الكرة مردش على استفسار الزمالك اللي اتبعت من أسبوعين غير النهارده بعد ما في ناس طلعت قصص وشائعات وأفلام من غير لازمة، ولو الاتحاد كان رد في وقتها مكنش حصل كل الهرجلة دي، الرد جاي بعد أسبوعين بالتمام النهارده العصر!”.
وشدد صبري: “في ناس بتحاول تعمل أفلام وتشغل الفريق قبل مباراتي البنك الأهلي وطلائع الجيش، لكن إحنا مركزين في الدوري وملناش دعوة بالسوبر دلوقتي، عندنا 25 لاعب وكل لاعب يقدر يعوض التاني والزمالك ما بيتأثرش بغياب حد”.
وختم حديثه بنبرة حاسمة قائلًا: “مواقع وإعلام طلعوا يقولوا الزمالك بيدرس الانسحاب من السوبر! جبتوا الكلام ده منين؟ مفيش أي تفكير في الانسحاب والزمالك جاهز ومستعد، وكل تركيزنا حاليًا على مباراتي البنك الأهلي وطلائع الجيش، وبعد كده نفكر في السوبر المصري”.
