“مش كل اللي اتقال صح”.. عبد الواحد السيد يُفجر مفاجآت غير متوقعة ويرد على حملة الهجوم ضد حسين لبيب! فيديو
تحدث عبد الواحد السيد، مدير الكرة السابق بنادي الزمالك، عن الجدل اللي حصل مؤخرًا بخصوص الكابتن حسين لبيب، مؤكدًا إن بعض الناس بتحاول تقلل من دوره في دعم النادي، رغم إنه ساعد كتير من ماله الخاص في فترات صعبة.
قال عبد الواحد السيد في تصريحات عبر برنامج “اللعيب” على قناة “MBC مصر”: “فيه حاجة ظهرت مؤخرًا على الكابتن حسين لبيب أنا مش عاجباني خالص، إنك تقلل من قيمة رئيس نادي الزمالك، ده تصرف مش محترم. اتقال كلام غريب جدًا، إنه تبرع بألفين ونصف دولار، كلام مش منطقي، وبيقلل من الراجل.”
وتابع: “الموضوع مش مجرد كلام على السوشيال ميديا، لأ، في ورقة من محضر مجلس الإدارة خرجت بكده، لكن للأمانة حسين لبيب في أربع سفريات للفريق، أنا بعت ليه الإداري أخذ منه ما بين 60 إلى 70 ألف دولار من جيبه الخاص عشان الفريق يسافر.”
وأضاف: “كمان كابتن حسين السيد دفع تقريبًا مليون ونصف دولار عشان النادي يقدر يفك القيد. الراجل دفع رقم كبير جدًا. وأنا رغم إني مش موجود في النادي حاليًا، لكن للأمانة ما بحبش التقليل من الناس اللي اشتغلت وساهمت.”
وأشار: “الأخطاء موجودة، ومفيش مشكلة إنك تنتقد، بس متقولش إن الناس دي ما كانتش بتدفع. بالعكس، كانوا بيدفعوا، ويمكن يرجعوا الفلوس بعد كده، بس الأهم إنهم كانوا بيفكّوا أزمات.”
واختتم: “عشان أوضح نقطة كمان، عشان البعض هيقول إني سبق ورفعت قضية على نادي الزمالك، أنا شخصيًا كان ليّ مستحقات عند الزمالك لمدة 3 سنين ونص، واتحكم لي بـ7 ملايين ونصف، لكني تنازلت عن 5 ملايين وخدت 2.5 مليون بس. يعني في النهاية، مش كل اللي ليه حق بيتمسك بيه كامل، لكن في ناس بتراعي مصلحة النادي قبل أي حاجة.”
