أشاد الإعلامي مهيب عبد الهادي، بأداء اللاعب حامد حمدان بعد المستوى المميز الذي قدّمه في مباراة فريقه الأخيرة أمام الأهلي، مؤكدًا أن اللاعب يمتلك روحًا قتالية وانتماءً كبيرًا يجعله جديرًا بارتداء قميص نادي الزمالك.
وقال مهيب عبد الهادي في تصريحات عبر برنامج “اللعيب”، على قناة “mbc masr”: “عايز اشيد بلاعب اسمه حامد حمدان. حامد حمدان امبارح كان زي رهوان لا يكل ولا ينام”.
وتابع: “حاجة كده كانت معتبرة. حاجة كده بيقول للناس كلها انا عايز العب في الزمالك، الراجل كان بيقاتل جاب جون ومنع أجوان، ايه اللي انت بتعمله ده يا حامد؟ ده حب على فكرة”.
وأضاف: “اللي يتفرج على حامد حمدان هو بيوصل رسائل لان ده النادي الأهلي المنافس الأول لنادي الزمالك. وكان شكله كده عايز يبقى متواجد في مباراة الأهلي والزمالك، لكن هو عمل اللي عليه”.
وواصل: “اقدر أقول انه منع نقطتين للنادي الأهلي، ونقطتين مهمين قوي، يعني كأنه شارك في ماتش الزمالك اللي فات. فحامد حمدان يليق بنادي الزمالك، ونادي الزمالك يليق بحامد حمدان”.
وشدد: “أداء جامد قوي بجد بصراحة العزيمة واللعب اللي عمله امبارح مش موجود في لاعيبة كتير. يستاهل يلعب بتيشرت نادي الزمالك أكتر من لاعيبة كتير موجودة ما عندهاش نفس الغيرة والحميه والحب”.
واختتم: “أنا شفته امبارح واحد بيحب نادي الزمالك حامد حمدان. راجل بيحب نادي الزمالك وحابب التواجد في نادي الزمالك، فما تحرموش حامد حمدان من التواجد لنادي الزمالك. لان نادي الزمالك محتاج النوعية دي من اللاعبين. ده مين؟ حامد حمدان”.
