مهيب عبد الهادي يفجّرها: أسرار صادمة داخل الزمالك.. “ملايين تُدفع والتدريبات خارج النادي وانا هتجنن!”
فجّر الإعلامي مهيب عبد الهادي مفاجأة من العيار الثقيل بشأن كواليس جديدة داخل نادي الزمالك، كاشفًا عن تفاصيل صادمة تتعلق بالأزمات المالية، والتدريبات خارج مقر النادي، وصفقة غامضة أثارت علامات استفهام عديدة داخل القلعة البيضاء.
وقال مهيب عبد الهادي في تصريحات عبر برنامجه “اللعيب”، على قناة “mbc masr”: “أما بخصوص نادي الزمالك، فهو نجح في منع شكوى جديدة ضده في فيفا؛ الكابتن حسين لبيب رئيس النادي تواصل في الساعات الماضية مع إدارة نادي نهضة الزمامرة المغربي، وأقنعهم بعدم تقديم شكوى جديدة”.
وتابع: “النادي المغربي كان يطلب 200 ألف دولار، وهي دفعة متبقية من صفقة صلاح الدين مصدق، واللي محدش عارف هو فين دلوقتي! لاعب كويس بس مش موجود”.
وأضاف: “في حاجات غريبة بتحصل في الزمالك، في لاعيبة مش موجودة، وفي لاعيبة بتيجي، وفي لاعيبة بتاخد فلوس، وفي لاعيبة لأ… يعني حاجات فعلاً تجنن”.
وأشار: “ومن الحاجات اللي تثير الدهشة كمان، إن نادي الزمالك بيتدرّب بره النادي! يعني عندك أزمة مالية طاحنة، وبرغم كده بتدفع فلوس علشان تتدرب بره النادي، رغم إن عندك ملعب، وغرف ملابس، ومستشفى، وكل الإمكانيات”.
واستكمل: “الفلوس دي ممكن توصل لمليون جنيه في الشهر أو أكتر. طيب ليه؟! ادّي المبلغ ده للاعيبة، أو استخدمه لسداد المستحقات”.
وشدد: “والله العظيم حاجات تجنن. النادي بيقول مافيش غير 15 ألف جنيه في الخزنة، وفي نفس الوقت بيتدرب بره النادي وبدفع ملايين في الشهر! ليه؟”.
واختتم: “لو المبالغ دي اتدفعت للاعيبة كدفعات، الأمور كانت هتبقى كويسة جدًا.. تخيّل إن في لاعيبة جت نادي الزمالك، وبتلعب باسم نادي الزمالك، لكنها عمرها ما دخلت مقر النادي! صدق أو لا تصدق… اديني عقلك!”.
