مهيب عبد الهادي ينفجر على الهواء: “نجم الزمالك يتعرض لحملات قوية.. وفي لاعيبة بطّلت بقت بتستقطب لاعبين للنادي!”

فجّر الإعلامي مهيب عبد الهادي مفاجآت من العيار الثقيل بشأن ما يحدث داخل نادي الزمالك، مؤكدًا وجود حالة من الفوضى والعشوائية في ملف كرة القدم داخل القلعة البيضاء، ومشيرًا إلى تدخل بعض اللاعبين المعتزلين في شؤون الفريق ومحاولاتهم التأثير على اللاعبين الحاليين.
وقال مهيب عبد الهادي في تصريحات عبر برنامجه “اللعيب”، على قناة “mbc masr”: “في لاعيبة بطلت بتكلم اللعيبة دلوقتي، خلي بالكم إحنا جايين هنبقى مشرفين على الكرة وبيستقطبوا اللعيبة.. يا سلام!”.
وتابع: “في لاعيبة موجودة بتتهاجم، تتهجم عشان علاقتها مش كويسة ببعض اللعيبة، إيه اللي انت بتقوله ده؟ إيه اللخبطة دي؟آه والله”.
وأضاف: “يعني عندكم مثلا لاعب زي حسام عبد المجيد، هذا اللاعب يتعرض لحملات لأغراض صعبة جدًا”.
وأشار: “حاجات ما ينفعش تتقال تتقال على القهاوي تتقال في الغرف بس فاض الكيل.. الكيل فاض لأن ما حدش باصص يعني كل واحد باصص لنفسه، ما حدش باصص للزمالك لحب الزمالك. في ناس بتمثل والله في ناس بتمثل ممثلين في حب الزمالك”.
وأردف: “طيب دي حاجة يبقى حسام عبد المجيد بيتعرض لحملات صعبة جدًا لأنه مش على هوى ناس معينة. اتخانق مع واحد يعني كده مش بلعه مش هضمه فعامل عليه حملات. ومعايا التفاصيل كلها جت لي فمش هقولها. لأن برده الناس كلها قريبة مننا بس حاجات تخض حاجات تدعو للدهشة”.
واختتم: “تعرفوا الزمالك اللي فيه دلوقتي ليه؟ من الحاجات اللي عندنا ما بنقولهاش. عندنا كده يعني أوراق كتير كده ما بنقولهاش بسبب إيه؟ مش ناقصه هي العملية يعني بصراحة يعني كفاية كفاية”.