“نقاش ساخن على الهواء”.. أحمد سليمان: الأهلي بيضعف منافسيه بالشراء.. وأسامة حسني يرد باستفزاز: “منافسنا هو بيراميدز”!
شهدت حلقة برنامج “اللعيب” على قناة MBC مصر نقاشًا ساخنًا بين الكابتن أحمد سليمان، عضو مجلس إدارة نادي الزمالك، والكابتن أسامة حسني، نجم الأهلي السابق، حول سياسة الانتقالات بين القطبين وتأثيرها على المنافسة في الكرة المصرية.
وقال أحمد سليمان: “موضوع الانتقالات والشراء بين الزمالك والأهلي ده إضعاف المنافس، الزمالك لما جه فيه حسام وإبراهيم حسن مع مجلس كمال درويش، الأهلي مشافش الدوري المصري كام سنة.”
وأضاف سليمان: “الأهلي بيعمل كده لإضعاف المنافسين اللي قدامه، عمل كده مع الزمالك علشان كده في لعيبته. والأهلي كان بيعمل كده كمان مع الأندية الإفريقية اللي بتلاعبه في إفريقيا، عملها في جيلبرتو والقائمة تطول. أي لاعب يكون مصدر قوة في أي نادي بيتم شراءه علشان يتم إضعاف المنافسين.”
ورد عليه أسامة حسني قائلاً: “لأ، الأهلي مش بياخد لعيبة علشان يضعف الزمالك، لأن المنافس بتاعنا حاليًا هو بيراميدز بقاله أربع سنين، وبص لترتيب الدوري.”
وبسؤاله من مقدّم البرنامج: “أمال أنتوا اتعاقدتوا مع زيزو ليه يا أسامة؟”، أجاب حسني: “علشان أقوي فريقي، وده لاعب حر.”
وعاد أحمد سليمان ليستكمل حديثه قائلًا: “يا جماعة مينفعش يبقى نادي معاه كل الموارد المالية والصرف ده، وباقي الأندية قاعدة تتفرج.”
وأشار سليمان إلى أزمة العدالة المالية بين الأندية المصرية قائلًا: “بيطلع قرار وزاري برحيل مجلس الإسماعيلي اللي معهوش فلوس يدفع أي جنيه، في وقت أندية تانية بتصرف ملايين على لعيبة مش بتلعب ربع ساعة وتمشي ببلاش! بالذمة ده منطق؟ مفيش عدل بين الأندية في مصر في الصرف، ودي هي الأزمة الحقيقية.”
