كشف هاني أبو ريدة، رئيس اتحاد الكرة، حقيقة وجود خلافات بينه وبين حسام حسن المدير الفني لمنتخب مصر ومصيره هو وتوأمه إبراهيم حسن مع الفراعنة.
وقال أبوريدة في حوار مع سيف زاهر تم نشره عبر الحساب الرسمي لاتحاد الكرة ردا على سؤال “لماذا دايماً الناس مصوّرة إن في فجوة ما بين الكابتن حسام والكابتن إبراهيم وحضرتك؟يعني دايماً حتى هما في تصريحاتهم إن هما الجمهور اللي جابهم، الشارع اللي جابهم؟:” الشارع ممكن يجيب آه وممكن يمشّي آه”.
وتابع:” أنا دايماً أضحك مع حسام وإبراهيم بقول لهم: يعني خدوا بالكم إحنا اتغلبنا في 2019 كل الناس مشيت. فيعني اشتغل، وأنا أي مدير فني أنا في ضهره، أنا باتكلم اللي بيحدث في مصر، آه، الرأي العام هيقولك “يلا أخويا، مع السلامة”.
وشدد ابوريدة:” فإحنا أهم حاجة الناس تبقى سعيدة، الناس فرحانة، بتقدم بشكل كويس، نعمل ماتشات كويسة، هو ده المطلوب. إنما بالعكس أنا دايماً أبقى بضحك معاهم وأطمنهم وبقولهم: “يا ابني إحنا النتائج اللي مقعدانا أنا وأنت”.
و أجاب على سؤال هل حضرتك تقدر تطمنهم إنهم موجودين في كأس العالم ولا بتقولهم نتائج كأس الأمم هي اللي هتحدد؟ قائلا:” أنا عمري ما أعمل كده. أنا باقول دي يا كابتن حسام إحنا عندنا هدف كأس العالم. ما بأبُصش لمرحلة منهم وهي البطولة الأفريقية، ثم بأتكلم معاه حتى في الإعداد ما بعد البطولة الأفريقية”.
وواصل ردا على سؤال يعني أنت بتتكلم مع حسام وإبراهيم إن هما مكملين بعد كأس الأمم؟: “أكيد، أكيد طبعاً. ده أكيد، ما أنا قلت لك اللي قبليها إيه؟ السؤال اللي قبل ده إيه؟ آه، قلت لك الرأي العام هيعمل فينا إيه! أنا حتى لما بأقعد معاهم ما بكلمهمش على بطولة الأمم الأفريقية بس، بكلمهم على لغاية آخر المشوار، لغاية كأس العالم القادم”.
