كشف الإعلامي إسلام صادق، عبر برنامج “اللعيب” على قناة “mbc masr”، عن العديد من الوقائع والأحداث التي شهدتها صفوف الزمالك خلال فترة تولي يانيك فيريرا تدريب الفريق، موضحًا أسباب اختلاف التعامل مع اللاعبين وبعض القرارات الفنية والإدارية التي أثارت الجدل داخل النادي.
وقال صادق: “أنا مش هقارن أحمد عبد الرؤوف بـ يانيك فيريرا.. ليه بقى؟ لأن يانيك فيريرا جه في فترة إعداد، جه اشتغل، جه كان بياخد تعليمات من جون إدوارد، يلاعب مين وما يلاعبش مين، أنا بقول لك بمعلومات.”
وأضاف: “يعني مثلًا واقع من ضمن الوقائع. فترة الإعداد يانيك فيريرا قعد مع محمد عواد قال له أنا هعتمد عليك قبل بداية الموسم. ثم بعد كده كان ده على رغبة جون إدوارد اللي كان واخد قرار إن محمد عواد ما يبقاش موجود، وبالتالي جون قعد قبل بداية الموسم مع محمد عواد، جاب له عرض للمصري وأنور شلوفة كان بيكلمه بقول لك بالأسماء، ومحمد عواد ما كانش بيرد عليه وكان العرض بـ 17 مليون جنيه. وبالتالي راح قعد مع فيريرا مرة ثانية ففيريرا قام قايل له لا أنت لسه أنا مش هعتمد عليك، فالراجل لا كان بياخد تعليمات كان بياخد تعليمات.. دي واقعة.”
وتابع: “بقول لحضرتك معلومات.. واقعة ثانية، أنا بقول لك الراجل كان بيتوجه، عبد الله السعيد وعمر جابر قعدوا مع جون إدوارد بعد ما اتغلبوا في المباراة الودية أمام وادي دجلة، من محمد الشيخ في المباراة الأولى اللي كانت ودية ما الزمالك اتغلب ودي ورسمي من دجلة، قالوا له احنا ما ينفعش نلعب بالطريقة دي. لأن احنا لو لعبنا بالطريقة دي هننكشف ولو لعبنا فريق منظم وقوي واتضغطنا احنا مش هنقدر زي بيراميدز زي سيراميكا وكانوا هم هيبدأوا أول مباراة سيراميك كليوباترا.”
وأوضح: “جون قال ليانيك فيريرا بلغ اللاعيبة إن احنا مش هنلعب بنفس الطريقة في كل الماتشات. قام الراجل قام داخل قام قايل نفس الكلام ناقل كلام جون إدوارد وجون ينفي بقى والرجالة تنفي ماليش علاقة أنا بقول لك وقائع كانت بتحصل، دي واقعة ثانية.”
وأضاف: “واقعة ثالثة بعد أحد المباريات عبد الله السعيد عمل أزمة كبيرة جدًا في أوضة اللبس بسبب إن في لاعيبة كانت ما بتتمرنش وكانت بتشارك في المباريات، بمعنى إنها كانت بتيجي بتاخد إجازات وتلعب وتتمرن مرة أو مرتين وتشارك أساسي في المباريات. زي مين؟ لا في لاعيبة لا أسماء كتير، يعني كان في أسماء كتير، إلى جانب حاجة رابعة ولا ده عشان كده بقول لك ما ينفعش أبدًا أقارن يانيك فيريرا.”
وأردف: “واقعة رابعة إن تجاهل بقى كل اللاعيبة اللي أنا مش هعتمد عليهم، اللي هو اللي أنت دلوقتي محتاج لهم واللي هم شالوك بعد كده. زي الجزيري، محمد عواد، ناصر منسي، أحمد فتوح. في البداية برده. أحمد فتوح كان بيقول لك ما بيقدرش يلعب 90 دقيقة وأنت شفته في ماتش بيراميدز كان عامل إزاي، وماتش الأهلي وأحمد فتوح ده في كل الأحوال بأسوأ حالاته هو أفضل من لاعبين كتير جدًا جدًا.”
وأوضح صادق رداً على سؤال عن تعليمات جون إدوارد: “أه اللاعيبة دي ما كانتش هتلعب عشان الصفقات الجديدة كانت تبدأ. تعالى في المباراة الثانية اللي ما بعد سيراميكا كليوباترا هتلاقي إن كل الصفقات يعني هو حب إن هو يستغل الحالة المعنوية والنشوة اللي كان عليها الزمالك بعد الفوز على سيراميكا، الصفقات معظمها لعبت كلها وده كان طريقة غلط في الدفع بالصفقات.”
