شهدت حلقة برنامج “اللعيب” على قناة MBC مصر نقاشًا ساخنًا بين عدد من نجوم الكرة المصرية السابقين، حول استعدادات الأندية المشاركة في بطولة السوبر المصري ومبدأ تكافؤ الفرص قبل انطلاق البطولة التي تجمع بين الأهلي، الزمالك، بيراميدز، وسيراميكا كليوباترا.
أسامة حسني بدأ حديثه قائلاً: “أنا بس قبل السوبر المصري عايز أتكلم عن تكافؤ الفرص بين الأندية المشاركة والعدل سواء من رابطة الأندية أو اتحاد الكرة المصري.”
وأضاف: “السوبر فيه الأهلي بصفته بطل الدوري، والزمالك بطل الكأس، وسيراميكا بطل كأس الرابطة، وبيراميدز بالكارت الذهبي.”
وتابع منتقدًا جدول المباريات: “الرابطة خلت الزمالك وبيراميدز يلعبوا يوم الأحد في القاهرة الساعة 5، والأهلي لعب الساعة 8 في إسكندرية، وبعدها رجع القاهرة علشان يسافر الإمارات، ففين العدل؟”
كما انتقد ترتيبات السفر قائلاً: “الأهلي هيسافر دبي وبعدها ياخد أوتوبيس ساعتين للعين، ولو كسب سيراميكا هيرجع يلاعب الزمالك أو بيراميدز اللي قاعدين مريحين في أبوظبي، ففين مبدأ المساواة؟ الأهلي بطل الدوري يعني لازم يكون ليه وضع خاص، مش يتعامل زيه زي اللي داخل بكارت!”
محمد صلاح رد على كلام أسامة قائلاً: “هو انت شايف إن دي حاجة مقصودة يعني؟ لأ يا عم، دي حاجة عادية جدًا.”
ثم أضاف ممازحًا: “طب إيه رأيك بقى في إيقاف دونجا؟ ده هيقعد 4 سنين تقريبًا!”
ليعلق أسامة حسني: “لا دي لائحة وقرار من اتحاد الكرة السابق، مفيهاش حاجة جديدة.”
من جانبه، خالد جلال علّق على تصريحات أسامة قائلاً بسخرية: “يا أسامة ده كل القصة على نص ساعة بالأوتوبيس! هما مش مسافرين في أدغال أفريقيا يعني علشان تقول إرهاق!”
وفي ختام الحلقة، سأل مهيب عبدالهادي ضيوفه عن توقعاتهم لنتيجة السوبر المصري، ليجيب أسامة حسني بثقة: “الأهلي طبعًا، الأهلي حتى لو في أسوأ حالاته أو عنده غيابات أو بيلعب بالناشئين هو المرشح الأول للبطولة.”
فرد مهيب مازحًا: “بأمارة إيه؟ ما إحنا شايفين النتائج الأخيرة!”
ليؤكد أسامة مجددًا: “مباريات الدوري وضع مختلف، لأنها بطولة طويلة وممكن يحصل دروب وترجع. الأهلي بعد الخسارة من بيراميدز رجع وكسب واتصدر، وهياخد الدوري في الآخر إن شاء الله.”
