شهدت حلقة برنامج “اللعيب” على قناة MBC مصر تصريحات نارية من نجم الأهلي السابق أسامة حسني، الذي وجّه انتقادات حادة لبعض جماهير ومسؤولي الزمالك بعد خسارة الفريق الأبيض أمام الأهلي في بطولة السوبر المصري الأخيرة، مؤكدًا أن نجاحات الأهلي تأتي من “منظومة بتفكر صح”، على عكس ما يحدث داخل الزمالك.
وقال حسني خلال حديثه في البرنامج: “هو الأهلي بياخد السوبر للسنة الخامسة على التوالي بالتحكيم؟! الأهلي واخد البطولة دي 16 مرة في تاريخه، والزمالك أربع مرات بس، يعني الـ16 دول كلهم بالتحكيم برضه؟! طول ما هنفضل نعلّق على حاجات برة الملعب، عمرنا ما هنتقدم خطوة”.
وتابع: “تعالوا نبص ورا شوية.. الأهلي جاب خوسيه ريبيرو، الراجل ما كانش موفق، اعترفوا بالغلط. عملوا إيه؟ كان قدامهم شهر 10، فيه توقفات دولية في 11 و12، فقرروا يغيروا المدرب بدري لأن عندهم رؤية وبصين للمستقبل. مش بيشتغلوا بالعشوائية”.
وأضاف: “كولر قعد 3 سنين وحقّق بطولات ومشي، بعده جِه ريبيرو، وبعده عماد النحاس كمؤقت ونجح، بس الأهلي ما خلاهوش يكمل، لأنهم كانوا محددين إن الراجل مؤقت من البداية. النادي ماشي بخطة واضحة مش بالصدفة”.
وواصل: “الأهلي عنده رؤية. عنده سوبر مصري، وعنده دوري أبطال إفريقيا، وعنده تدعيمات جاية في يناير، فلازم يبقى عندك مدير فني من دلوقتي يشارك في القرار ويقول رأيه. ده التفكير الصح”.
وأشار: “الأهلي منظومة. الكابتن محمود الخطيب مشرف على الكورة، بس مش بياخد القرارات لوحده. عندك سيد عبد الحفيظ نائب المشرف، لجنة تخطيط، مدير رياضي، مدير كورة، وهيكل إداري كامل بيشارك في القرار. يعني القرار في الأهلي بيطلع صح لأنه نابع من منظومة كاملة”.
واختتم حسني حديثه برسالة قوية موجهة للزمالك: “لكن في نادي الزمالك، القرار في إيد شخص واحد.. وده ما ينفعش. الزمالك نادي كبير وتاريخ كبير وجماهير ضخمة، فلازم القرارات تطلع بعد دراسة من أكتر من جهة علشان المصلحة العامة. كفاية فردية”.
