أكد أيمن عبد العزيز أن أحمد سيد زيزو أصبح محل تقدير وإشادة كبيرة بعد انتقاله إلى الأهلي، على عكس ما كان يُقال عنه خلال فترة وجوده في الزمالك، مشيرًا إلى أن تقييم اللاعب تغير بالكامل بين الجماهير والخبراء، وأنه يعتبره أفضل لاعب كرة في مصر حاليًا، مع توضيح الفارق بين التعامل الصادق مع اللاعبين في الزمالك وبين الانتقادات والتقديرات المتقلبة في الأندية الأخرى.
وقال أيمن عبد العزيز في تصريحات عبر برنامج “اللعيب”، على قناة “”mbc masr: “هخرج بره السياق شويه أخد من كلام الكابتن خالد جلال.. لما كابتن خالد اتكلم على زيزو وقال إن معظم لاعبيه النادي الأهلي أو كل نجوم النادي السابقين وحتى جماهير النادي الأهلي قبل ما زيزو يروح نادي الأهلي كانوا بيتكلموا عليه بشكل، وبعدين دلوقتي بقى بيتكلموا على شكل خالص، عشان كده دايمًا بقول لك هربط دي بس بكلامي أنا الفني عن الأهلي وعن الزمالك وعن بيراميدز وعن سيراميكا”.
وأشار: “احنا مختلفين، الحمد لله، أسوياء الزمالكاوية، الناس اللي بتمرن في الزمالك والناس اللي بتشغل في نادي الزمالك احنا ناس أسويه، احنا الصح بنقوله صح والغلط بنقوله غلط على أي حاجة.. فده الفرق بينا، ده اللي بيخليني أقول إن نادي الزمالك ممكن يطلع ثالث عادي جدًا، وانا واحد من مدربين الزمالك”.
وأردف: “ده الفرق بينا وبين أي حد إن احنا زي ما بقول لك، أسويه، احنا مش تبع الموجة ولا تبع أكل عشنا، احنا ناس بتقول الحق أو اللي يرضي ضميرنا أو اللي احنا شايفينه”.
واستكمل: “زي ما دلوقتي بتيجي تسالني على زيزو، هقول لك إنه أحسن لاعب كرة في مصر، بيلعب في الأهلي، بيلعب في الزمالك، بيلعب في الترس، هو زيزو، هو الراجل، انت تقيمه كده”.
وواصل: “غير الناس اللي زيزو كان موجود في نادي الزمالك، فيفضلوا يقولوا عليه ما قالوا مش عارف، قالوا إيه، وقالوا إنه لاعب كرة عادي. دلوقتي هو موجود في النادي الأهلي، انتم عاملينه تمثال، عاملينه إله”.
واختتم: “غير الناس اللي لما زيزو كان بيلعب في نادي الزمالك وبقى بيلعب عندهم دلوقتي في النادي الأهلي، قبل ما يلعب في النادي الأهلي كانوا بيقولوا عليه كل حاجة وحشة، دلوقتي بيقولوا عليه كل حاجة حلوة”.
