شهدت حلقة برنامج “اللعيب” على قناة MBC مصر تصريحات نارية من نجم الأهلي السابق إسلام الشاطر، الذي عبّر عن استيائه من تبريرات بعض المنتمين لنادي الزمالك بعد خسارة الفريق الأبيض أمام الأهلي في نهائي السوبر المصري بالإمارات، مؤكدًا أن المشكلة الحقيقية داخل الزمالك “فنية وليست تحكيمية”.
وقال الشاطر خلال حديثه في البرنامج: “بصراحة أنا تعبت وزهقت من تكرار نفس الكلام. كل ما الأهلي يفوز، نسمع نفس الأسطوانة. واحد يقول المعلق، والتاني يقول الحكم! يا جماعة الأهلي كان أفضل من الزمالك في التسعين دقيقة، بعيد عن الكلام اللي بيتقال بقى (هل زيزو سلّم على هشام نصر ولا ما سلّمش)”.
وتابع: “يا جماعة، المتفرج العادي اللي بيقعد يتفرج على الماتش، بيشوف قدامه فريق كويس هو الأهلي. واحد صاحبي زملكاوي قال لي (يا عم إنتو كسبتوا على الواقف)، قلت له تمام.. دي شهادة تقدير! طب ما بالك لو ما كسبناش على الواقف؟ كنا كسبنا بخمسة ولا ستة؟”.
وأضاف الشاطر: “شكرًا إنك قلت إننا كسبنا على الواقف 2-0، بس المفروض تهني الأهلي على الفوز. لما تسأله عن أزمة الزمالك يقولك (المعلق والحكم). لأ يا جماعة، اتكلموا عن أزمة الزمالك نفسها، حطّوا إيديكم على المشكلة، مش على اللي حوالين الملعب، ولا إن زيزو ما سلّمش، ولا إن أَمام عاشور كان بيضحك!”.
وواصل: “كلنا عارفين الكلام ده، وكلنا لعبنا الأهلي والزمالك قبل كده. بس الزمالك بقى عنده مشكلة كبيرة جدًا. وأنا والله كأهلاوي بزعل لما أشوف الزمالك بالشكل ده، لأن في الآخر الأهلي والزمالك بيكملوا بعض”.
وأردف قائلاً: “الزمالك ضلع أساسي في الكرة المصرية، بس الصفقات اللي قدامي دي مش لايقة بنادي الزمالك خالص. الأسماء دي ما تنفعش تلعب في نادي بحجمه وتاريخه”.
واختتم الشاطر حديثه برسالة قوية: “مين اللي اختار اللاعبين دول؟ لازم يتحاسب. ولو أبناء الزمالك مش قادرين يقولوا الحقيقة، فأنا بقولها”.
