“اتنين محترفين وربع”.. كواليس صادمة من جهاز منتخب مصر تكشف حقيقة تصريحات حسام حسن عن مصطفى محمد! فيديو

تحدّث الإعلامي أحمد شوبير عن حالة الجدل المثارة مؤخرًا حول تصريحات المدير الفني للمنتخب حسام حسن، خاصة بعد مباراة أوزبكستان والرأس الأخضر، موضحًا حقيقة ما قصده الجهاز الفني بشأن اللاعبين المحترفين وتحديدًا مصطفى محمد.

وقال شوبير في تصريحاته عبر برنامجه الإذاعي صباح اليوم الخميس: “الدنيا لسه سخنة شوية بعد تصريحات كابتن حسام حسن في الفترة الأخيرة، خصوصًا التصريح اللي كان بخصوص مصطفى محمد وقصة إن عندنا اتنين محترفين وربع. وأنا الحقيقة تواصلت مع شخصية بارزة جوه جهاز حسام حسن، وقلت له مش هذكر اسمك، لكن بلغني نصًا إن اللي قاله الكابتن حسام كان واضح… إن المنتخب عنده فعليًا اتنين محترفين بس: صلاح ومرموش، ومصطفى محمد يعتبر اتنين وربع لأنه مشاركاته مع ناديه مش ثابتة”.

وتابع شوبير: “المصدر قاللي إن مصطفى محمد لاعب مميز، ولو بياخد فرصته بشكل أساسي كان هيكسر الدنيا هناك. بس لازم نعترف إن المنتخبات اللي بنواجهها عندها 20 و30 لاعب محترف في أوروبا، وإحنا بنعاني في الحتة دي”.

وأضاف: “المصدر وضّح كمان إن التصريح كان تعليق على مشاركات مصطفى محمد مع فريقه… ولو كان فيه خلاف بين مصطفى ومحمد حسام زي ما البعض قال، مكانش اللاعب هييجي المنتخب من الأساس. محدش بيجبر حسام إنه يضم لاعب. وفعلاً مصطفى بيلعب دلوقتي كأساسي، وكمان هو الأقرب لقيادة هجوم المنتخب الفترة الجاية وفقًا للتنافس اللي موجود”.

واستكمل قائلاً: “يا جماعة إحنا داخلين على بطولة أفريقيا، فاضل 28 يوم بس. لازم الدنيا تهدى شوية ونهيّأ أجواء إيجابية للمنتخب. اللي انتقد التصريح على راسي، ومن حقه يشوفه غير موفق، بس خلاص… خلّونا نقفل الصفحة ونركز في اللي جاي”.

واختتم شوبير حديثه: “إحنا محتاجين نشتغل بهدوء ونبعد عن الحساسية والمشاكل. يا رب الدنيا تهدى وإن شاء الله المنتخب يبقى في أفضل حال”.