تحدث ماهر غريب، رئيس المنظومة الإعلامية بنادي الزمالك، عن تعيين أحمد عبد الرؤوف مديرًا فنيًا للفريق الأول لكرة القدم قبل منافسات كأس السوبر المصري، مُشددًا على أنه قرارًا صائبًا.
وقال ماهر غريب في تصريحات عبر قناة “mbc masr”: “الثقة في مدرب من أبناء النادي حاجة إيجابية جدًا. حاجة كويسة إنك تحط الثقة في واحد من ولاد النادي، خصوصًا كلنا عارفين الظروف اللي تم فيها إنهاء التعاقد مع فيريرا، الوقت كان ضيق جدًا.”
وأضاف: “أحمد عبد الرؤوف كان لسه داخل الجهاز من 48 ساعة بس، وبعدها اتكلف بالمهمة. ووجهة نظر الإدارة بالتنسيق مع جون إدوارد كانت إن الأفضل يبقى هو. هو واحد من ولاد النادي، واشتغل قبل كده في الدوري الممتاز مع بلدية المحلة، وقدم مباريات كويسة، ولو كان عنده إمكانيات أكتر كان شكل الفريق اختلف.”
وتابع: “هو واحد من أولاد النادي، ومدرب عنده شخصية وطموحات كبيرة جدًا. الدعم اللي بياخده من كل الناس في النادي، وترحيب الجمهور بيه، حاجات هتساعده جدًا إنه ينجح ويحقق آمال الجماهير.”
وأردف: “وليه لأ مايبقاش واحد من مدربي الزمالك الكبار اللي سابوا بصمة؟ الزمالك طول عمره بيطلّع مدربين كبار من ولاده.”
واستكمل: “إن شاء الله أحمد عبد الرؤوف يكون واحد منهم، ويسيب بصمة كبيرة جدًا مع الفريق الأول، وتكون بداية خير ليه، ويبقى من المدربين اللي النادي يعتمد عليهم في المستقبل.”
