رد هشام نصر نائب رئيس نادي الزمالك،علي تصرف أحمد سيد زيزو،لاعب الأهلي معه خلال تسليم ميداليات بطولة السوبر المصري بالذي أقيم بالإمارات
وكان زيزو قد تجاهل مصافحة هشام نصر علي منصة التتويج اثناء تسليم الميداليات عقب مباراة نهائي السوبر
وقال نصر، خلال تصريحات تليفزيونية عبر المحور:” اللي حصل من زيزو على منصة التتويج في نهائي السوبر تصرف غير محترم ومش منضبط، ولازم يتعرض على لجنة الانضباط فورًا، من غير حتى ما الزمالك يقدّم شكوى”.
وتابغ:” الأعراف والبروتوكولات في تسليم الجوائز واضحة جدًا، واللي بيحصل فيها لازم يكون فيه احترام متبادل، إنما اللي عمله زيزو مش من أخلاق اللعبة ولا من سلوك لاعب محترف”.
و شدد نصر:” لو إحنا كنا خالفنا البروتوكول، كانوا هيطلعوا يقولوا علينا غلطنا، طب ليه لما الطرف التاني يغلط محدش بيتكلم؟ ولا لازم نرد بنفس الأسلوب علشان ناخد حقنا؟”.
و أضاف:” أنا ممدّدتش إيدي أسلم على زيزو، لأنه كان طالع شكله مش طبيعي ومتعمد يتجاهل، رغم إني كنت ناوي أسلم وسلمت على كل لاعيبة الأهلي اللي طلعوا قبله”.
وواصل نصر: “اللي حصل دا اتشاف قدام الناس كلها وفي مناسبة رسمية، والمفروض إن النادي الأهلي نفسه قبل اتحاد الكرة يكون عنده موقف من السلوك دا”.
وأردف:” احترام البروتوكول مش رفاهية، دا واجب، ولازم يكون في رد من لجنة الانضباط عشان أي لاعب بعد كده يعرف إن اللي عمله زيزو ميتسكتش عليه”.
وزاد نصر: “اللي مستغرب له أكتر إن خالد مرتجي محاولش يخليه يسلم، ورغم إن دا الطبيعي في مناسبة زي دي، أنا قولتله دي قلة ادب والمفاجأة قالي ” معاك حق ” وتاني يوم خالد مرتجي نشر صور نفس اللحظة على صفحته الرسمية كأن مفيش حاجة حصلت”.
وأكمل:” رغم إنه تعرض لموقف مشابه لما مريم مصطفى في فريق الطايرة، رفضت المصافحة ونيرة الأحمر اللي اصغر أعضاء المجلس تدخلت ونبهت عليها بعد كده إنها لازم تسلم، وده الفرق بين إدارة بتحافظ على القيم وإدارة بتسكت على الغلط”.
وأختتم: “إحنا بنقول إعلاء الروح الرياضية وبنتعامل باحترام.. لكن واضح أن الكلام ده مبقاش منه فائدة، الفتره الجايه العين بالعين والسن بالسن”.
