تصريحات نارية.. الزمالك: الصمت دليل قوة وليس ضعفًا.. ولا توجد أزمة قيد والحملة ضدنا ممنهجة!

علق ماهر غريب، رئيس المنظومة الإعلامية بنادي الزمالك، عن الجدل المثار في الآونة الأخيرة، بعد التعاقد مع مدرب حراس مرمى برتغالي في الجهاز الفني للفريق الأول لكرة القدم، مُشددًا على أن القلعة البيضاء تنال من الانتقادات الممنهجة عكس أندية أخرى.

قال غريب في تصريحات عبر برنامج “اللعيب”، على قناة “mbc masr”: “المدرب موجود مع الفريق، وتم الاتفاق معاه. والجدل ده بصراحة واضح إنه ممنهج، ومستغرب جدًا منه، لأن في ناس في أندية تانية حصل معاهم نفس الكلام ومحدش اتكلم. المدرب برتغالي، واشتغل قبل كده في مصر، طب ليه محدش اتكلم لما كان في فاركو؟”.

وأضاف: “الأمر مُبالغ فيه شوية، وجماهير الزمالك واللاعبين والجهاز عارفين كويس إن الهدف من الكلام ده تشتيت تركيز الفريق. لازم يكون المعيار واحد، اللي بيحصل مع الزمالك يحصل مع الكل والعكس. لكن دايمًا الزمالك هو اللي بيتهاجم، ويتقال إن في غضب أو إن الراجل هيمشي. وده مش طبيعي”.

وشدد قائلًا: “الفرق الكبيرة بتتعامل معاملة الكبار، وأحيانًا الصمت بيبقى دليل قوة مش ضعف. الصمت ده للقوة مش للضعف. مش لازم ترد على كل صغيرة وكبيرة. خلينا نشتغل كورة، اللي بيحصل ده هل بيخدم الكورة في مصر؟ أكيد لأ”.

وعن أزمة إيقاف القيد، قال: “ولا حاجة، الموضوع بسيط. الإيقاف ده على قيد يناير، وإحنا دلوقتي في نوفمبر. في يناير مش هيكون في أي إيقاف قيد على الزمالك، بسيطة جدًا ومش مستاهلة الضجة دي كلها.”

وأضاف: “الزمالك من كام شهر سدد حوالي 7 مليون دولار للاعبين ومدربين كان ليهم قضايا في فيفا. اللي بيدفع المبلغ ده مينفعش يتكلموا معاه على 50 أو 100 ألف دولار! في أولويات، وممكن الفلوس دي تروح لدعم فرق تانية زي السلة أو اليد. النادي مش بيتعمد يدخل مشاكل، بس عنده أولويات. وبأكد تاني: في يناير مفيش إيقاف قيد.”