علق ابراهيم حسن مدير منتخب مصر، على مشاركة الفراعنة في بطولة العين الدولية الودية،بعد الفوز على كاب فيردي بركلات الترجيح وحصد المركز الثالث.
وقال حسن خلال تصريحات تليفزيونية على “اون سبورت”:” يعني طبعًا أنا بقول الحمد لله، أكيد مكسب في تمرين، ومكسب في ماتش ودي، ومكسب في الرسمي أهم طبعًا، بس هي القصة إنّي أصلّح حتة الماتش اللي فات”.
وأضاف: “الماتش اللي فات، إنت مكنتش وحش، إنت عملت شكل كويس، وكنت ضاغط عليهم من أول الشوط الأولاني، والشوط التاني كان أحسن اوي”.
وتابع حسن:” اتخطفت في أول ثلاث دقائق، وطبعًا الوقفة كانت غلط، والراجل عدى من نص الملعب، فدي كانت غلطات، يعني هدف غلطة مينفعشي”.
وشدد: “وإنت طول الماتش راكب وحاططهم في نص ملعبهم الشوط الأولاني والشوط التاني نفس الشيء”.
وواصل حسن:” الفرقة دي عايشة مع بعض وبقالهم فترة كبيرة جدًا، والناس في أوزبكستان مطلعين، والناس دي وصلت كأس عالم من أول خطوة، يعني ولا ملحق ولا أي حاجة”.
وأستأنف: “الناس دي بتخطط وشغالين من فترة كبيرة جدًا، وزي ما أنت شفت كانوا حافظين وبينفذوا بطريقة غريبة جدًا، زائد القوة الجسمانية زائد القوة والسرعة اللي عندهم”.
وأكمل حسن:” الناس دي قاعدة ملهمشي حاجة غير إنهم يجهزوا منتخب عشان يوصلوا بيه كأس العالم، وحصل، ماتش من الناس اللي مبصتش على أوزباكستان أو مش متابعاها، فرقة محترمة، فرقة منظمة”.
وأختتم:” إحنا اشتغلنا عليها، وحظنا إن الشوط الأولاني زي ما قلت لك غلطة الناس اللي أخطأت في حتة الضغط على الراجل اللي كانت معاه الكورة في الهدف الأولاني، الشوط الأولاني كنا كويسين، والشوط التاني أحسن قوي وبنحاول، بس خلاص هو تمرين وخلص”.
