تحدث حازم إمام، نجم الزمالك السابق، عن مميزات وصفات الراحل محمد صبري، اسطورة الفارس الأبيض، الذي غيبه الموت اليوم إثر حادث سير.
وقال إمام، خلال مداخلة هاتفية عبر قناة الزمالك:” البقاء لله لنا ولكل المصريين، والله ربنا يرحمه ويغفر له، صدمة طبعًا، وكل شيء بيد ربنا، وكلنا راضون بقضاء الله، لكن الصدمة إن صبري كان لسه إمبارح بيكلمنا وكلنا شايفينه بصحة كويسة.. ربنا يا رب يصبّر أهله وبناته وزوجته وعيلته ويصبّرنا جميعًا؛ إحنا أصحابه وإحنا جيل كبير عشناه مع بعض أكتر ما عشناه في بيوتنا”.
وتابع:” صبري واحد من أهم اللاعبين اللي جم نادي الزمالك، ومن أحرف اللاعبين، وكان في جيلنا هو الرقم واحد. كلنا كنا بنقول “ده هيبقى حاجة كبيرة جدًا جدًا”، وهو فعلًا حاجة كبيرة، لكنه مخدش حقه من الصحافة والإعلام، ومقعدش كتير.. صبري اتوقف ودخل في شوية مشاكل هو مش سببها، اتفرضت عليه بسبب روحه وغيرته على النادي دايمًا*.
وشدد إمام:” صبري شخصية جميلة جدًا، طيب جدًا، ولذيذ جدًا.. صبري كان دايمًا في المنتخب أخف دم في العالم، وكان معروف إن تجمعنا كله يبقى عنده في الأوضة، وبنقعد ورا في الأوتوبيس مع بعض نهزر ونضحك”.
وأردف:” لما كبر، تحس إنه اتطور جدًا إعلاميًا، وبقى مذيع محترم وبيهتم بكل كلمة، وبيتكلم بلباقة كبيرة.. واشتغل مدرب سنين طويلة جدًا، في القطاع، وفي الفريق الأول، يعني اشتغل لعيب ومدرب ومذيع في القناة، وربنا يرحمه إعلاميًا كبيرًا”
وأشار إمام: “للأسف أنا لسه بره مصر عندي شغل، ومش هعرف أرجع دلوقتي.. عرفت الخبر النهارده الصبح، وجمال حمزة كلمني”.
وواصل:” محمد صبري يستاهل حاجة كبيرة، وأنا عندي ثقة إن ده هيحصل إن شاء الله، وإدارة نادي الزمالك أكيد هتعمل حاجة تليق بيه.. وهو دلوقتي شاف حب الجماهير على مستوى مصر كلها، مش على مستوى الزمالك بس”.
وزاد إمام:’ إحنا بنتكلم دايمًا عن الزمالك والأهلي والكلام اللي مش بيقدم ولا يأخر، لكن للأسف الناس مبتشوفش قيمة الموضوع غير لما حد يتوفّى… يقولوا بعدها “الكورة مش مستاهلة”، وبعد يومين نرجع نشتم بعض تاني وندخل في نفس الدائرة”.
وأكد:” السوشيال ميديا ليها فوائد، لكن ليها عيوب خطيرة جدًا. أنت يا بني آدم بتشوف شتيمتك بعينك، وتشوف الناس بتتكلم عليك بشكل وحش.. زمان مكناش بنشوف ده، لكن دلوقتي أي كلمة تقولها عن الزمالك أو الأهلي، الناس اللي ضدك تشتمك وتقلل منك، والحاجات دي بتحبط الواحد نفسيًا وبتضايقه جدًا”.
وأستكمل إمام:” أتمنى اللي حصل النهارده يخلي الناس تتعظ شوية، وتخلّي النقد باحترام، ويخلّي اختلاف الآراء ميفسدش للود قضية.. في الآخر إحنا بنتكلم في الكورة”
وأستطرد: “كلنا بنحب صبري، والناس كلها بتحبه. شخصية جميلة، وعمره ما عمل حاجة وحشة، وكان دايمًا قلبه أبيض ويحب الخير لزمايله”.
وأختتم:” بما إننا كنا في نفس المركز، عمره ما زعل، ولا عمره دخل في مشكلة. كان دايمًا بيحبني جدًا، ولما يتكلم عليّ يتكلم أحسن كلام، كان أحرف وأحسن واحد فينا والله، وحاجة نفتخر بيها… وربنا يرحمه يا رب ويرفع درجاته”.
