انفجر حسام حسن المدير الفني لمنتخب مصر بتصريحات نارية بعد حصد المركز الثالث في بطولة العين الدولية الودية.
وقال حسن،خلال تصريحات عبر قناة “أون سبورت”:” سواء كسبنا الماتشين أو خسرناهم دي مباريات تدريب وتعديلات، بعتمد على كل اللاعبين الموجودين والمصابين، عندي إصابات.
مبروك للمصريين اللي بجد، في فريق بيتعمل، واللي متعرفهوش إن الناس اتأخرت أوي في ضخ لاعبين جدد لمنتخب مصر، بقول كده للبهوات اللي في الاستوديوهات”.
وأضاف: “بقول للناس الطيبين احنا بنجرب وبنشوف حالة اللاعبين المصابين، اليوم لما المغرب بيغيب عنهم حكيمي بيقولوا حكيمي غاب”..
وتابع حسن” انا عايز الناس تهدى شوية، في ناس نفسيتها وحشة، لو مدرب أجنبي موجود هيقولوا شفته الخبرات والنباهة، ياعم احنا مصريين وبنفكر انا بحب بلدي وشعب مصر الطيب”.
وشدد: “استفدنا من التجربتين، رغم الإصابات الكثيرة، عايز أقول حاجة، اللاعيبة دي لعبت 4 مباريات في 10 أيام، لاعبي الأهلي والزمالك وبيراميدز، عايز أقول للبيفهموا ويحبوا بلدهم، انا بمرن تمرينتان بس قبل المباريات، واللاعيبة جاية مرهقة ومصابة، في إيه يا جماعة انا بجرب وبدخل لاعبين جدد، إيه المشكلة؟ الناس بتصبر ليه على الأجنبي، انا مش باخد رزق حد، الجهاز ده بيتعب.. انا سكت كتير”.
واردف حسن:” انا هعمل زي المدربين الأجانب وهشتغل كده، السوشيال ميديا خربت بيوت وبلاد ربنا يخلصنا منهم.
قبل كده كنتم بتقولوا المدرب الأجنبي طلع لاعب ولا اتنين، احنا دلوقتي مطلعين كام لاعب؟ دول ذخيرة جديدة.. اهدوا شوية على بلدكم خليكم زي الشعب الطيب، حتى لو كنا خسرنا اليوم ايه المشكلة؟”.
وواصل: “انا راضي عن الفريق في المباراتين، اه الهدف جه بشكل مش كويس لكن الأخطاء من الضغط على الكرة، يطلع بقى واحد فنان ويتريق، انا هفضل كده”.
وأختتم:” احنا وصلنا كأس عالم وكأس أمم اللي زعلان يستخبى على جنب، الجهاز ده وصل لكأس العالم بتعب من غير هزيمة والجاي صعب، والمستوى اللي هنلعب فيه أعلى من اللي فات’.
