شن أحمد حسام ميدو، هجوم عنيف ضد مجلس إدارة الزمالك، بعد الخسارة أمام الأهلي في نهائي السوبر المصري، وكشف عن خطة قدمت للمجلس قبل رحيل لجنة التخطيط.
وقال ميدو، خلال تصريحات تليفزيونية ببرنامج: ” أوضة اللبس” المذاع على قناة النهار:” قرارات إدارة الزمالك جاءت في توقيت خاطئ، وكانت من الأسباب الرئيسية وراء خسارة الفريق أمام الأهلي،و غياب الاستقرار الإداري والفني أثر بشكل واضح على أداء الزمالك في اللقاء”.
وتابع:” اختيار أحمد عبد الرؤوف إنه يخوض بطولة السوبر، شايف إنه اتظلم فيها بشكل كبير جدًا، باختيار أعضاء للجهاز الفني أول مرة يشتغلوا معاه، ودي نقطة مهمة جدًا وفاصلة إنه يخوض بيهم ماتش السوبر”.
وشدد ميدو:” النتيجة كانت إنك كسبت بيراميدز وعملت ماتش محترم، لكن لما لعبت قدام فرقة متحضّرة كويس ووراها جمهورها، مشاكلك بانت، مش بس في تحضيرك للسوبر، لكن كمان في تحضيرك للموسم كله”.
و أستطرد:” النهارده لما اضطريت تلاعب شوية لعيبة كنت متعاقد معاهم وفاكر إنك مش هتحتاجهم في الوقت المهم، ربنا أراد إنك تحتاج لهم، واللاعيبة دي مع احترامي الكبير قالتلك رسالة واضحة: “إحنا مش لعيبة الزمالك”.
وأشار ميدو:’ النهارده في أربع لعيبة شاركوا في الماتش، بدأ منهم تلاتة، ومش هقول إنهم اختيارات سيئة، لكن هقول إن عيب إنهم يحطوا فانلة الزمالك على جسمهم، خصوصًا إنهم جايين بفلوس كتيرة”.
وواصل:” فلازم يبقى في مراجعة، لأن الزمالك نادي كبير ومينفعش يتساب كده، والزمالك ليه أصحاب، وأصحاب الزمالك الحقيقيين هم جمهوره”.
وأكمل ميدو:” البلان اللي كانت معمولة ومتقدمة لمجلس الإدارة، وأنا هنا مش بغسل إيديا من أي حاجة، أنا بقول تاريخ ووقائع، وأنا مع أي مجلس قاعد على الكرسي، حطيت إيديا في إيد مرتضى منصور، وفي إيد الدكتور كمال درويش، وفي إيد الكابتن حسين لبيب”.
وزاد:” البلان كانت واضحة: جون إدوارد ييجي مدير رياضي عنده خبرات، ومعاه “تكنيكال دايركتور” محترف، يكون ولاؤه وإخلاصه لمجلس إدارة الزمالك، علشان تخلق التوازن اللي يخلي المجلس ياخد قرارات صح”.
وأستأنف:” لكن اللي حصل في الزمالك، وللتاريخ، اللي حصل ده مش بتاع منظومة كرة قدم، لأن الناس كانت فاكرة إن الكورة بتدار زي أي لعبة تانية، وده غلط، الكورة ليها خصوصيتها وليها رجالها اللي فاهمينها.
وأردف ميدو:” لازم الناس دي تكون موجودة، عشان تعمل التوازن اللي يوصلك للنجاح، والغلط مش عيب، بس العيب إنك متصلحوش، لأن الزمالك ليه أصحاب، وأصحاب الزمالك جمهوره، وجمهور الزمالك عمره ما هيسيب حد ييجي على ناديه
وأختتم:” جمهور الزمالك ممكن يحبك، ويقف جنبك، ويدعمك، لكن في الآخر بيحب الزمالك أكتر منك، وأنا هنا مش بتكلم عن نفسي”.
شاهد:
