قال الإعلامي الأحمر أحمد شوبير، إن تكرار الكلام عن “المظلومية” في نادي الزمالك بقى أمر ممل ومش مفيد، مؤكدًا إن الحل مش في الشكوى ولا في تبرير الأخطاء، لكن في مواجهة الحقيقة والاعتراف بالمشاكل والسعي لحلّها.
وقال شوبير في تصريحاته عبر برنامجه الإذاعي صباح اليوم الثلاثاء: “بلاش بقى قصة أصل مش عارف ده ضربني وبكى وسبقني واشتكى. المظلومية دي خلاص بقى، موضوع مش لطيف ومش حلو. أنا بحب الراجل اللي ييجي يقول الزمالك اتمظلم في كذا بسبب كذا، تمام، دي وجهة نظره، والتاني يرد ويقول وجهة نظره، لكن طول ما إحنا ماشيين بنزرع في الناس فكرة إن الزمالك دايمًا مظلوم، يبقى كده إحنا بنغلط.”
وأضاف: “يعني كل حاجة نرجعها إن أصل الزمالك اتمظلم في كأس السعودية، وفي كأس الإمارات، وفي الطيارة، وفي كل حاجة! إيه ده؟! هو في إيه؟! أنا مش عايز كل شوية نرجع لموضوع مظلومية جديد، أنا عايز حلول بقى. عايزين نفكر إزاي نصلح، مش كل مرة نقعد نحكي ونلوم الظروف.”
وتابع: “مرة واحدة واجه نفسك يا زمالك بأخطائك ومشاكلك، حتى لو فعلاً اتظلمت في شوية حاجات. تعالى قول عندي كذا وكذا، ونتكلم وندور على حلول. وأنا والله هكون أول واحد يساعدك، لكن بالشكل ده الحقيقة الأمور مش ماشية كويس، لا ليك ولا لجمهورك.”
واختتم شوبير حديثه قائلًا: “اللي يستحق التحية في كل اللي بيحصل ده هم جماهير الزمالك، الناس دي صابرة ومخلصة لناديها رغم كل اللي بيعدي بيه النادي من أزمات ومشاكل.”
