شوبير يصرخ في وجه إدارة الزمالك ويشن هجومًا ناريًا عليهم: “الجماهير مكتوب عليها قلة الراحة”! فيديو
كشف الإعلامي أحمد شوبير عن تفاصيل جديدة تخص أزمات نادي الزمالك، مؤكدًا إن النادي الأبيض غارق في قضايا وغرامات مالية كبيرة، وإن السبب الرئيسي في استمرار الأزمات هو سوء إدارة الملف المالي وعدم الالتزام بالاتفاقات السابقة.
وقال شوبير في تصريحاته عبر برنامجه الإذاعي صباح اليوم الثلاثاء: “أزمة الزمالك الحقيقية هي كتر القضايا المرفوعة عليه وكتر الغرامات اللي متراكمة على النادي، وآخرها كانت قضية فرجاني ساسي. وكأن الزمالك مكتوب عليه دايمًا يعيش في دوامة المشاكل. الجماهير تفرح شوية بصفقة أو بفوز، وبعدها على طول تصدم بمشكلة جديدة.”
وأضاف: “الزمالك عامل شوية صفقات كويسة، زي بيزيرا، وكمان شيكو بنزا وعدي الدباغ، وعدي سجل كذا جول كويس. أما المحليين زي محمد إسماعيل فهو يمكن أكتر واحد أثبت نفسه، وعمرو ناصر وأحمد شريف لسه ماخدوش فرصتهم كاملة. كل ده طبيعي في الكورة، بس الجمهور قال خلاص إحنا جبنا صفقات وعدّلنا شكل الفريق.”
وتابع شوبير: “لكن للأسف، بعدها على طول تطلع 3 أو 4 أحكام جديدة بوقف القيد، وبعد كده ييجي حكم تاني امبارح لفرجاني ساسي بنص مليون دولار غير الفوايد وغير القضايا التانية. طيب والزمالك هيعمل إيه؟ هيروح المحكمة الفيدرالية، بس خلوا بالكوا، المحكمة دي مجرد تأجيل شوية، يعني كسب وقت لا أكتر، لأن الحكم خلاص بقى نهائي.”
واستكمل حديثه قائلًا: “فيه مصدر مسؤول في الزمالك قال لي: عندنا لسه قضايا مع جروس وغيرُه. طب إزاي القضايا دي رجعت تاني بعد ما كانت خلصت؟! إيه اللي كبرها كده؟ الناس بتقول مفيش فلوس، ماشي، بس يا جماعة فيه حاجة اسمها ترتيب أولويات. الإدارة اللي فاتت كانت عاملة شغل كويس مع عمرو أدهم، الراجل كان بيتفاوض صح، وجدول الفلوس، وكل حاجة كانت ماشية تمام، بس حتى بعد الاتفاق، النادي ما التزمش.”
وختم شوبير كلامه قائلًا: “أي مجلس إدارة جديد داخل الزمالك عارف هو داخل على إيه. ماينفعش كل شوية نقول دفعنا 10 ولا 100 مليون دولار وخلاص. لأ، اللي يدخل المجال العام لازم يكون عنده حلول حقيقية، لأنه لما قررت تتحمّل المسؤولية، لازم تكون قادر تحقق أحلام وطموحات جماهير الزمالك، مش تفضل تبرر وتتكلم عن مشاكل قديمة.”
