شوبير يطلق تصريحات نارية بعد أزمة عواد في الزمالك: “أنا عندي الحل وعلى مسؤوليتي”! فيديو
أبدى الإعلامي أحمد شوبير استغرابه من غياب الحارس محمد عواد عن قائمة الزمالك في المباراة الأخيرة، ملمحًا إلى وجود حالة من الغضب لدى الحارس، وموجهًا نصائح مباشرة لإدارة النادي بشأن ملف حراسة المرمى وطريقة التعامل مع اللاعبين الشباب داخل الفريق.
قال شوبير في برنامجه الإذاعي صباح اليوم الأحد: “أنا الحقيقة عايز أحكي حكاية بسيطة كده… يمكن قلت يوم الخميس إن التنافس بين صبحي وعواد تنافس قوي ومحترم، والاتنين ممتازين، وده شيء كويس جدًا. لكن في النهاية الزمالك محتاج يشوف الأصلح، خصوصًا في البطولة الإفريقية أو الكونفدرالية.”
وأضاف: “امبارح لعب صبحي… وفجأة ملقتش عواد في الاحتياطي! ليه؟ حد قال لي إنه زعلان أو متضايق. لقيت الولد الصغير محمود الشناوي هو الاحتياطي. استغربت… عواد فين؟ حد بيقول زعلان! أتمنى يكون الكلام ده غلط، وإن عواد غاب عشان برد، شدّ، أي حاجة… ولو قالولي عنده برد هصدّق، لأنّي شايفه سليم وبسلم عليه ومافيش حاجة.”
وتابع: “قبل السفر لجنوب إفريقيا، المهدي سليمان اتقال إنه كان متضايق وماسافرش واتحوّل للتحقيق… هو قال لأ، والنادي قال أيوه. طب كل شوية هنعمل مشكلة؟”
وواصل شوبير: “أنا بناشد نادي الزمالك… يا جماعة والله ما تخافوش. صعّدوا الولد عمر عبدالعزيز اللي عنده 17 سنة. الولد ده موهوب جدًا وعلى مسؤوليتي. ومحمود الشناوي كمان لعب من سنتين وماكانش وحش، ولو كان خد ماتشات زيادة كان هيبقى ممتاز.”
وأضاف: “بس كالعادة في وجود الحراس الكبار بيقعدوا الشباب، وتروح تجيب لاعيب جديد. وأنا دايمًا قلت إن المهدي سليمان حارس أنا بحبه، بس عنده 38 سنة! يعني ما بتبصوش لبكره؟ ما بتبصوش للمستقبل؟ بتبصوا تحت رجليكم بس!”
وأردف: “المهدي سليمان لعبته نص ساعة في ماتش… حاجة غريبة وعجيبة. فلازم تفكروا… مش أي مسؤول يقولك هجيب فلان تقول له تمام. لأ يا باشا، لازم تناقش. لأن في الآخر الحساب هيكون عليك.”
واختتم: “أتمنى إن عواد ما يكونش زعلان… وأتمنى إن الكلام اللي اتقال لي ما يكونش صحيح.”
