كشف الإعلامي أحمد شوبير عن وجود حالة من القلق داخل الوسط الكروي بسبب تضارب محتمل بين قرارات الجهاز الفني للنادي الأهلي وخطط الجهاز الفني لمنتخب مصر، وهو ما قد يؤدي إلى أزمة غير مرغوبة مع اقتراب موعد معسكر المنتخب استعدادًا للاستحقاقات المقبلة.
قال شوبير في برنامجه الإذاعي صباح اليوم الأحد: “أنا مش عايز أعمل مشكلة ولا أقول إن في أزمة حصلت، بس في حاجة لازم ننتبه ليها من بدري. الأهلي إدّى لاعيبته أجازة خمس أيام بعد ما رجعوا من المغرب والماتش الصعب قدّام الجيش الملكي.”
وأضاف: “ييس توروب والجهاز المعاون سافروا الدنمارك يقضّوا الأجازة، طب فين المشكلة؟ الأهلي شايف إن اللعيبة محتاجة ترتاح بعد سلسلة ماتشات مرهقة جدًا.”
وتابع: “المنتخب بيفكر يضم اللعيبة بدري شوية، وكان المفروض القرار يطلع من يوم، بس لسه مفيش حاجة رسمية. الأهلي قال إن الجهاز الفني أوصى بخمس أيام أجازة… طب لو الكابتن حسام حسن قرر يجمع اللعيبة بدري؟”
وواصل: “لاعبي الزمالك إن شاء الله هيوصلوا القاهرة خلال ساعات، ونفس الموقف هتلاقيه عند الزمالك وبيراميدز. حسام حسن شايف إن الدوري واقف والمنتخب الأولمبي سافر الدوحة، فعايز يضم اللعيبة المتاحة كلها.”
وأضاف شوبير: “اللي أنا متأكد منه إن الأهلي والزمالك وبيراميدز — ودي معلومات — التلاتة عايزين لعيبتهم تاخد راحة. بيراميدز بس ماعندوش رفاهية الراحة عشان عنده ماتشات الدوري، لكن الأهلي والزمالك فاضيلهم، والسؤال: هل هيوافقوا ولا لأ؟”
واختتم تصريحاته: “أتمنى الموضوع يتحل بسرعة… مفيش داعي لأي صدام. الأهلي بيقول إن ماتش المنتخب مع نيجيريا يوم 14، ولما اللعيبة تروح في ميعادها يبقى منطقي وطبيعي. ودي وجهة نظر جوه النادي الأهلي، ومعلومة اتقالت لجهاز الكورة ومجلس الإدارة بدون أي مشكلة.”
