أشاد الإعلامي أحمد شوبير بأداء أحمد فتوح، لاعب الزمالك، خلال مباراة فريقه الأخيرة أمام بيراميدز، مؤكدًا أن اللاعب قدّم مستوى مميزًا استحق به العودة إلى صفوف المنتخب الوطني بعد فترة من الغياب.
وقال شوبير في برنامجه الإذاعي صباح اليوم: “بصراحة، بيراميدز كان نجم الماتش الأول، لكن فتوح كان عامل ماتش كبير جدًا. مش عارف هو حس بحرية أكتر ولا إيه، بس شكله مرتاح في الملعب وبيقدّم كورة حلوة. فتوح لعيب شاطر وعنده إمكانيات، وحسام حسن أول ما حس إن الولد رجع لمستواه، قاله تعالى على طول، إنت واحشني.”
وأضاف: “أنا شايف إن فتوح عنده موهبة حقيقية، بس لازم يركّز في الكورة ويعرف قيمته. أنا قبل كده كلمت لعيبة كتير زي إبراهيم سعيد وعمرو زكي وصالح جمعة، كلهم كانوا نجوم كبار وموهوبين جدًا، بس ما سمعوش الكلام وده اللي ضيّعهم.”
وتابع: “إبراهيم سعيد كان معايا في المنتخب الأولمبي وكنت دايمًا بنصحه، ودلوقتي لما بيشوفني بيقولي يا ريتني سمعت كلامك. عمرو زكي كمان كان ممكن يبقى من أعظم المهاجمين في تاريخ مصر، زيه زي حسام حسن ومحمد صلاح، بس ما ركّزش. وصالح جمعة نفس القصة، موهبة كبيرة ضاعت عالفاضي.”
واختتم شوبير كلامه قائلًا: “يا فتوح، احترم موهبتك واشتغل على نفسك، لأنك لعيب كويس جدًا، وإن شاء الله تكون رجعتك للمنتخب بداية جديدة ليك.”
