تحدث الإعلامي أحمد شوبير صباح اليوم الاثنين عبر برنامجه الإذاعي عن حالة القلق التي سيطرت على جماهير الزمالك بعد الإصابات التي تعرض لها عدد من لاعبي الفريق خلال المباراة الأخيرة، مؤكدًا أن هناك غيابات مؤثرة قبل بطولة السوبر المصري المقبلة.
وقال شوبير: “جماهير الزمالك كانت في حالة قلق امبارح بعد الإصابات اللي حصلت التلاتة، وأنا هقول لكوا بالضبط توقّعي أنا الشخصي.”
وتابع حديثه عن إصابة اللاعب أخوان زيزيرا قائلًا: “الجهاز الطبي قال إن زيزيرا جاله إصابة في العضلة الخلفية، وطلع وكان بيعيط بعد الماتش بشدة، وهيعمل فحوصات عشان يحددوا حجم الإصابة، بس بصراحة، أي شد في الخلفية بيحتاج بالميت 10 أيام، فالمؤكد بنسبة 100% إن زيزيرا مش هيلعب في السوبر.”
ثم أضاف موضحًا الفرق بين أنواع الإصابات العضلية: “شد السمانة بيكون أخف شوية، ممكن يبقى تقلص عضلي، لكن الخلفية لأ، هو كان حاسس إن في حاجة حصلت فيها، وده يخليه برّه حسابات السوبر.”
وعن موقف محمد صبحي حارس المرمى، قال شوبير: “محمد صبحي عنده إجهاد، والإجهاد بياخد من يوم لتلاتة بالكتير، فالموضوع بسيط وهيبقى جاهز للسوبر إن شاء الله، ولو حتى غاب، الزمالك ما عندوش مشكلة في الحراسة، عندك مهدي سليمان حارس هايل، ومحمد عواد كمان جاهز.”
واستكمل عن وضع صبحي في المباراة الأخيرة: “هو كان رابط رجله قبل الماتش، وده معناه إنه كان حاسس بحاجة من الأول، فممكن يغيب عن أول ماتش، بس الإجهاد بيخف في 48 ساعة، يعني الموضوع بسيط.”
وبالنسبة للظهير الأيسر أحمد فتوح، قال شوبير: “أنا سألت واستقصيت بنفسي، وطلعت إن فتوح كويس. الجهاز الفني ما رضيش يعمل التبديل السادس بتاع ضربات الرأس، لأن لو عمل كده البروتوكول الطبي بيجبر اللاعب يغيب أسبوع، هما رفضوا عشان ما يتحرمش من السوبر، فممكن يغيب يوم كمان أو يومين بالكثير، وبعدها يكون جاهز.”
وعن حالة آدم كايد، ختم شوبير تصريحاته قائلًا: “آدم كايد مش هيلحق السوبر، وده مؤكد بنسبة 100%. الإصابات دي محتاجة وقت أطول شوية، فمفيش أمل يلعب.”
