ما بين تبرير “قلة الذوق” ورد الفعل.. نقاش ناري على الهواء بين أسامة حسني ودويدار وطارق السيد والشاطر حول تصرف زيزو! فيديو
شهدت حلقة برنامج “اللعيب” على قناة MBC مصر، مناقشة حادة بين مجموعة من نجوم الكرة المصرية السابقين حول تصرف اللاعب أحمد سيد “زيزو”، نجم النادي الأهلي، بعدم مصافحة هشام نصر، ممثل نادي الزمالك، خلال مراسم التتويج ببطولة السوبر المصري في الإمارات.
بدأ الحوار بمداخلة من أحمد دويدار، الذي أكد رفضه التام لأي إساءة تصدر من الجماهير تجاه اللاعبين، سواء من جمهور الأهلي أو الزمالك، موضحًا: “أنا ضد أي جمهور يشتم لاعب. جمهور الأهلي لما شتم شيكابالا كان غلط، وجمهور الزمالك لما شتم زيزو برضه غلط. إحنا ضد أي جمهور يشتم لاعب”.
وأضاف دويدار موضحًا موقفه من الواقعة: “زيزو بيمثل مصر في الإمارات، والأستاذ هشام نصر بيمثل نادي الزمالك ومصر، وما فعله زيزو بعدم مصافحته إهانة لكل الواقفين سواء من الأهلي أو الزمالك أو اتحاد الكرة. اللي يدافع عن زيزو بحجة إن جمهور الزمالك شتمه، طيب ما جمهور الأهلي شتم شيكابالا، ليه دافعتوا عن شيكابالا وقتها؟ رد فعل زيزو غلط، لأنه لازم يفرق بين كونه لاعبًا يمثل الأهلي وبين كونه لاعبًا يمثل مصر في دولة عربية”.
من جانبه، اتفق طارق السيد، نجم الزمالك السابق، على أن ما فعله زيزو لا يتفق مع الأعراف الرسمية، قائلاً: “البروتوكول بيقول إن اللي حصل غلط. حتى لو كان في موقف سابق بين زيزو ومجلس إدارة الزمالك السابقة، بروتوكوليًا ما كانش ينفع الموقف ده يحصل، لأن الناس كانت واقفة كشكل عام، وده ما ينفعش”.
وتحدث إسلام الشاطر، نجم الأهلي السابق، مؤكدًا دعمه للروح الرياضية رغم تفهمه لما تعرض له زيزو من ضغوط، وقال: “أنا دايمًا مع الروح الرياضية، وده اللي الكابتن الخطيب دايمًا بيعلمنا إياه. لكن بروتوكوليًا، كان لازم زيزو يسلم والدنيا تمشي. أنا عندي فيديوهات بصوت وصورة بتوضح إنه اتعرض لحاجات كبيرة جدًا جوه الملعب، بس رغم ده ما كانش المفروض يتصرف بالشكل ده، لأن عقليته المفروض تكون أكبر”.
أما أسامة حسني، لاعب الأهلي السابق، فاعتبر أن الواقعة لها جذور سابقة وليست وليدة اللحظة، موضحًا: “الموضوع ده رواسب قديمة. واضح إن أحد المسئولين سلموا زيزو للجمهور علشان يتعرض للسباب هو ووالده. وده بدأ وقت مفاوضاته مع الزمالك، لما اتقال عليه كلام مغلوط. لكن يُحسب لزيزو إنه من بعد ما مشي من الزمالك لحد دلوقتي، عمره ما قال كلمة خارجة عن جمهور الزمالك أو لاعبيه أو مجلس إدارته، رغم السباب اللي اتعرض له”.
وعندما سأله الإعلامي مهيب عبد الهادي عن تأييده لموقف زيزو، أجاب حسني: “ده موقف يرجع لشخص زيزو. محدش عاش تجربته، ولا نعرف اللي حصل جوه الغرف. يمكن اللي حصل معاه ومع والده وقتها كان صعب، فهو أدرى بنفسه”.
وتداخل طارق السيد مجددًا مؤكدًا أن الاعتراف بالخطأ لا يُنقص من اللاعب شيئًا: “والله ما عيب يا أسامة إنك تقول إنه غلط، ده مش عيب، لأن دي بروتوكولات وأصول، والراجل خلاص راح الأهلي”.
بينما أصر دويدار على موقفه قائلًا: “زيزو لا يمثل نفسه فقط. في مباراة بين الأهلي والزمالك خارج مصر، لازم أسلم على الجميع، ده جزء من احترام البروتوكول”.
ورد عليه إسلام الشاطر مؤكدًا وجهة نظر مغايرة: “زيزو يمثل نفسه، ودي حرية شخصية، وكل واحد ليه وجهة نظر. أنا مختلف مع دويدار ومع طارق، لكن في النهاية زيزو لاعب محترف، وعنده رواسب كتير زي ما طارق قال”.
واختتم طارق السيد النقاش موضحًا: “أنا بكلمك عن بروتوكول عام. لما أطلع أستلم ميدالية، لازم يبقى واقف عضو مجلس إدارة أو رئيس النادي، وده جزء من الشكل الرسمي اللي لازم نحافظ عليه”.
