سلّط الإعلامي الأحمر أحمد شوبير، في برنامجه الإذاعي صباح النهارده التلات، الضوء على تطورات جديدة تخص نادي الزمالك، بعد قرار جديد من الفيفا بإيقاف القيد لثلاث فترات بسبب مستحقات مالية لم تُسدد.
وقال شوبير: “في إيقاف قيد جديد على نادي الزمالك لمدة 3 فترات. وللأسف الزمالك عنده أكتر من إيقاف قيد، وده آخر واحد فيهم. وإحنا بققالنا كذا يوم وكذا شهر بنقول يا جماعة خلّوا بالكوا… القضايا كتير وتقيلة، وكان لازم تتقفل بدري، خصوصًا إن مبالغها مش كبيرة، وكمان النادي عمل تسويات في بعضها… بس ما كمّلش”.
وأضاف: “الإيقاف الجديد ده جاي بسبب شكوى كريستيان جروس. جروس زي ما أنتوا فاكرين كان مشي من الزمالك بعد مشكلة، ورفع قضية. وبعدها المجلس الحالي رجّعه وادّاه جزء من فلوسه… وبعدين مشي تاني. كل اللي ليه دلوقتي 133 ألف دولار بس. ومع ذلك، الزمالك اتوقف قيده عشان المبلغ ده”.
وتابع: “هتقولي الزمالك هيدفع… طب ليه من الأول أخلي قرار زي ده يطلع عليّا؟ ليه أبقى شكلي مش حلو قدّام الفيفا؟ وبالمناسبة… في ناس قالت حتى لو الزمالك دفع القيد مش هيتفك. الكلام ده غلط. أنا سألت عامر العمايرة وقاللي: أول ما الزمالك يدفع… القيد يتفك فورًا”.
واستكمل: “الزمالك عنده خمس قضايا عليهم إيقاف قيد، تلاتة منهم بسبب مساعدي جوزيه جوميز… كل واحد ليه 20 ألف دولار، يعني 60 ألف في التلاتة، وقضية جروس بـ 133 ألف دولار. المجموع كله 313 ألف دولار… يعني حوالي 14 مليون و933 ألف جنيه.”
وأردف: “دي الغرامات المطلوبة علشان يتشال الإيقاف. ادفع يتشال على طول. طب يا جماعة… 313 ألف دولار؟ محبي الزمالك أو أعضاء مجلس الإدارة مش قادرين يدبّروا المبلغ ده؟ وبفكركم… كابتن حسين السيد قبل كده دفع مبالغ بالدولار من جيبه”.
وأوضح: “في ناس بتدخل النادي وتقعد في الملعب وتعمل مؤتمرات صحفية… طب إنت مين؟ إيه صفتك؟ حتى عضو مجلس إدارة ما ينفعش يعمل كده من غير قرار مجلس إدارة كامل. القصة كلها ببساطة: 313 ألف دولار… طب فين؟ قولولي. ولسه كمان في مستحقات شيكابالا وفرجاني ساسي… يعني داخلين على حوالي مليون ونص دولار. وجماهير الزمالك ذنبها إيه تعيش في دوامة كل شوية؟.
وأشار: “وأنا راجع من برّه من يومين، واحد سألني عن موضوع أرض أكتوبر… قلت له: اعرف القصة الأول. لأن مشاكل الزمالك كلها اتحطّت تحت عنوان أرض أكتوبر! طب فين فريق الكورة؟ فين النتائج؟ فين استعدادات البطولات؟ فين ألعاب الصالات؟ مينفعش كل حاجة تتقال عليها أرض أكتوبر. ده موضوع إداري… الإدارة تتصرف فيه مع الدولة والمحكمة. الجمهور ملوش علاقة”.
واختتم شوبير: “نرجع لملف الزمالك والماتش اللي رايح له… بس كان لازم أوضح الصورة كلها. وكمان كابتن حسين السيد قال لصحيفة التليجراف إن الفيفا بالفعل أخطر الزمالك بقرار إيقاف القيد، وإنهم شغالين على حل الأزمة. وقال إن الإيقاف هيفضل لحد ما يتسدد مستحقات جوميز وجهازه وجروس، وإنهم بيحاولوا يخلصوا الموضوع قبل يناير… وربنا يسهل”.
