علق محسن صالح، لاعب الأهلي السابق، على واقعة تجاهل أحمد سيد “زيزو” لنائب رئيس نادي الزمالك، هشام نصر، أثناء تواجده على منصة التتويج بعد فوز الأهلي على الزمالك بهدفين دون رد في نهائي السوبر المصري، موضحًا أسباب تصرف اللاعب ومقدماً رؤيته حول الحلول الممكنة لمثل هذه المواقف.
وقال صالح في تصريحات عبر برنامج “اللعيب” على قناة “mbc masr”: “دي أحداث عالمية، في كل بطولة عالمية بتجد مشهد زي ده.. جوارديولا ما عملهاش؟، دي أحداث عالمية بتحدث نتيجة تراكمات ماتت في النفوس”.
وتابع: “يعني انت قاعد بتهاجمني وبتسيء ليا وبتهني، ومش عارف اخد حقي منك وبعدين جت الفرصة ان انا شفتك لكن انا مش هقدر ان انا أخرج، عفوا عن الروح الرياضية فهعمل ايه؟ هتجاهلك”.
وأشار: “فاهم انا ضد، طبعا انا ضد. يبقى الحل ايه؟ لابد ان اللوائح تتغير انه لابد انه يكون في الزام على الكل اللي هيطلع المنصة دي يتبع النظام.”
وعلق: “لازم تسلم على كل الضيوف اللي ما عندوش استعداد انه يسلم ما يطلعش، يطلع من ورا كده يروح يقف في الحتة التانية هناك يستنى عشان يحتفل او يستلم الميدالية بتاعته من هناك. لكن التصرف ده انا ضده.”
وواصل: “لكن الحل ايه؟ مش هتقدر تمنعه لأنه ده انفعال وقتي. لحظة ما شفته افتكرت كل اللي حصل لي، افتكرت الهتافات اللي في المدرجات، افتكرت السوشيال ميديا بتقول لا.. كل دي بتبقى في دماغ اللاعب.”
وأضاف: “انا مش عارف بصراحة الولد زيزو تحمل الضغوط دي ازاي. واضح ان عنده ثبات انفعالي عالي جدا. يعني اي حد تعرض للموقف ده ممكن يترك الملعب ويمشي، ممكن ما يلعبش، ممكن كل قراراته غلط: استلم الكوره مشدود هنا غلط هنا غلط هنا غلط.. بيبقى مش شايف.”
وأردف: “لكن هو لعب تقريبا احسن مباراة عملها من يوم ما جا للنادي الاهلي بهذا المستوى، صنع هدفين وادى مستوى. معناها الثبات الانفعالي عنده عالي اذا الحل ايه؟ يبقى في لوائح لابد وعقوبات صارمة.”
وقال: “يعني هل بتأيد اللي زيزو عمله؟ لا، انا بديلك المبرر، لكن انا كصفة عامة انا بقول لك لابد لوائح. اللي يطلع لابد انه يسلم عيب، لابد انه يسلم على كل الضيوف. لكن لما تكون في حالة زي دي مؤثرة، يبقى نبحث عن حل تاني. الحل الاخير ايه؟ خليها سلام ياباني يا سيدي، مش لازم تسلم بايدك خلاص.”
وأضاف: “وهينفع السلام الياباني؟ اه ينفع لان انت مش قادر تسيطر على مشاعرك.”
وختم صالح: “الموضوع شق شقين: شق ما تعرض له اللاعب وما اثر عليه، وشق في الأصول واللوائح والذوق والروح الرياضية. لابد ان احنا نلتزم بها.”
