أكد محمد الشناوي، كابتن النادي الأهلي، خلال المؤتمر الصحفي الذي عُقد قبل مواجهة فريقه أمام سيراميكا كليوباترا في نصف نهائي كأس السوبر المصري المقام في الإمارات، على جاهزية اللاعبين ورغبتهم القوية في تحقيق الفوز والتأهل إلى النهائي.
وقال الشناوي: “إحنا سعداء جدًا إننا موجودين في بلدنا التانية الإمارات، ودي مش أول مرة نكون موجودين هنا. الاستقبال والتنظيم ممتاز، وإحنا كلاعيبة بنكون مبسوطين جدًا إننا نلعب في الإمارات، وبالنسبة لنا مش حاجة غريبة علينا.”
وأضاف: “بقالنا يومين هنا بنجهز لماتش سيراميكا، وماشيين بشكل كويس في المعسكر، وبنجرب ونحضر بشكل ممتاز. زي ما الكوتش قال، هدفنا إن شاء الله نلعب النهائي، وأهم حاجة نركز في ماتش بكرة، لأن ده هدفنا الأساسي، وبعد كده بإذن الله نوصل النهائي.”
وتحدث الشناوي عن منافس الأهلي قائلًا: “فرقة سيراميكا فرقة محترمة وماشية بشكل كويس في الدوري الممتاز من فترة. عاملين موسم قوي ونتائجهم ممتازة، لكن في بطولات السوبر الماتشات بيكون ليها طابع خاص وأجواء مختلفة.”
وأشار إلى أهمية اللعب أمام جماهير الأهلي في الإمارات: “اللعب هنا في الإمارات وسط جمهور الأهلي بيكون له طعم خاص، والأهلي متعود على البطولات دي وعلى اللعب وسط جماهيره هنا في ملعب نادي العين. كل الفريق متشوق يخوض الماتش في الأجواء دي والملعب هيكون متقفل بالجماهير.”
وتابع قائد الفريق الأحمر: “إحنا جاهزين ومحضرين بشكل كويس، وزي ما دايمًا بنقول، أي بطولة بندخلها عينينا على اللقب عشان نفرح جمهورنا ونرجع بالكأس إن شاء الله.”
كما شدد الشناوي على روح الجماعة داخل الفريق قائلًا: “معانا اتنين لاعيبة صغيرين، لكن في الأهلي الكل سواء، القايمة كلها 30 لاعب مفيش فرق بين كبير وصغير. أهم حاجة عندنا هي النادي، وبنخدم بعض، وإحنا مجموعة واحدة وفريق واحد.”
وأضاف: “هدفنا الأساسي هو الفوز بالبطولة عشان نفرح جمهورنا، وده السبب اللي إحنا جايين عشانه. اللي فات انتهى، دلوقتي كل تركيزنا على ماتش سيراميكا بكرة، وده اللي بنتكلم فيه كلاعيبة وكفريق. دايمًا بنفكر في اللي جاي مش في اللي فات، وهدفنا نضيف بطولة جديدة لدولاب البطولات في النادي.”
واختتم الشناوي تصريحاته قائلًا: “دي أول بطولة في الموسم، وبتكون دافع قوي جدًا للدوري وأفريقيا والبطولات الجاية. ومع وجود كوتش جديد، ده بيشكل حافز كبير لكل اللاعيبة، إننا نبدأ موسم قوي ونقدم أفضل ما عندنا. كل اللاعبين الـ30 جاهزين، وأي لاعب يكون موجود بيدافع عن اسم الأهلي بكل قوة، وهدفنا الدائم هو التتويج بالبطولات.”
