فتح محمد صبري،نجم الزمالك السابق، النار على خالد مرتجي، أمين صندوق الأهلي، بسبب رد فعله بشأن تصرف زيزو الغير رياضي مع هشام نصر نائب رئيس الفارس الأبيض.
وقال صبري،خلال تصريحات تليفزبونية عبر قناة “الزمالك”:” الأغرب من دا كله تصرف خالد مرتجي، اللي كان واقف وشايف كل حاجة، وما عملش حاجة! في موقف زيزو “.
وتابع:” هو ده المسؤوليه؟ أو هي دي المسؤوليه اللي حضرتك مكلف بيها من ملايين من الأهلاويه في العالم كله؟ طب يا أخي على الأقل احترم تاريخ الزمالك”.
وأردف صبري: “يا أخي على الأقل احترم إدارة الزمالك، وأنا هنا ما بتكلمش على إدارة موجوده دلوقتي أو إدارة كانت موجوده قبل كده أو إدارة هتبقى موجوده بعد كده، اسمها مجلس إدارة نادي الزمالك”
وواصل:” أي حد موجود، المجلس ده استقبلوكم استقبال الفاتحين، لو تفتكر فرشنا لكم الأرض، وقلنا وكنا فاكرين كلنا كزملكاويه إننا هنفتح صفحة جديدة بقى مع بعض، اللي هو الطبيعي بين الناديين، أكبر ناديين في الوطن العربي”.
وأشار صبري:” لكن للأسف، للأسف اللي اتعود على الأساليب دي مش ممكن يتراجع عنها، للأسف لما حضرتك تبقى واقف جنب نائب رئيس نادي الزمالك، يا تقول حاجة خير يا تسكت أحسن”.
وزاد:” لكن حضرتك طالع بتصريح النهارده وتقول إنك بتدعم اللاعب؟ هو إنت هتدعمه في إيه تاني؟، ما إنت مدعم اللاعب ده ومميزه عن كل زمايله من ساعة ما دخل لك النادي ده، إنت مديه دعم محدش واخده في مصر، ولا لاعب خده في مصر قبل كده”.
وأستأنف صبري:” فاسكت، هتدعمه على إيه يعني؟ بتدعمه على الفيسبوك على إيه؟ ما إنت مدعمه، مهننه، مروقه، مظبطه، ومديله خطوتين تلاته أربعة قبل كل اللاعيبة اللي موجودة”.
واستطرد:” إنت حر، لكن بلاش استفزاز، طب ما إحنا عارفين إن إنت بتدعمه، لكن هتدعمه في الغلط كمان؟ وإنت عارف إنه غلط؟، على الأقل احتراماً للراجل والمسمى اللي جاي بيه، رئيس بعثة الزمالك، واقف جنبك”.
و أضاف: “بدل ما توقف اللاعب وتقول له “لأ، غلط كده”، بدل ما يكون في رد فعل لحضرتك مع تصرفه، لأ، بتطلع تدعمه تاني يوم كمان على صفحتك وتنزل الصور”.
وأكمل:” يا سيدي، ما الجمهور دايماً بينتقد وبيهاجم في مباريات القمة، ده عادي من زمان من السبعينات والتمنينات، بس مفيش مرة شفنا لاعب يرد بشكل مستفز كده قدام الكاميرات”.
وأكد صبري: “هو حضرتك مسمعتش جمهور الأهلي كان بيقول إيه في الماتش نفسه؟ ولا كنت سامع اللي في التالتة شمال وسادد ودانك عن التالتة يمين؟!”.
وشدد:” أقول لك على حاجة، والله العظيم إحنا كزملكاويه لا منتظرين منكم رد فعل، لأن في مواقف قبل كده وقبل كده وقبل كده، سابقة بتأكد ليا أنا وبتأكد لكل الزملكاويه إن بين قوسين “القيم والمبادئ” اللي عندكم بتتشال وقت اللزوم”.
وأختتم: لما يكون الموقف عليك، ولو الموقف على هواك، بتحطها وتقول إحنا عندنا قيم ومبادئ، لكن اللي مش على هواك، لا شايف، ولا سامع، ولا بتتكلم”.
