فتح الإعلامي مهيب عبد الهادي، النار على مجلس إدارة الزمالك، بعد الخسارة أمام الأهلي في كأس السوبر المصري، مُشددًا على أنه لا يجد مسؤولًا حقيقيًا في القلعة البيضاء.
وقال مهيب عبد الهادي في تصريحات عبر برنامج “اللعيب”، على قناة “mbc masr”: “بنبارك للنادي الأهلي بفوزه ببطولة السوبر المصري بعد مباراة كبيرة ومهمة أمام نادي الزمالك أول إمبارح في دولة الإمارات الشقيقة. مباراة مهمة للنادي الأهلي وفي توقيت مهم جدًا تحت قيادة فنية جديدة، مستر “يستروب” أول بطولة ليه، الراجل ما بقالوش أيام وحصل على بطولة مع النادي الأهلي”.
وتابع: “هي دي قيمة النادي الأهلي، هي دي قامة النادي الأهلي وهو ده النادي الأهلي، دائمًا يكون حاضر في المنافسات الكبيرة رغم إن النادي الأهلي مش هو أحسن حاجة، مش هو النادي الأهلي اللي نعرفه، كان ممكن عنده أكثر من كده، لكن بيفوز بيكسب، بيُسعد جماهيره، بيعرف يبسط جماهيره. فيه نادي بيعرف يبسط جماهيره، وفي نادي بيحب يضايق جماهيره عادي جدًا، هي دي كرة القدم. لكن هو النادي الأهلي كده، طبيعته كده، عشان كده دائمًا تلاقي جماهير النادي الأهلي مع أي بطولة ما بيكسبهاش النادي الأهلي بيبقى عنده مشكلة. ليه يا عم ده أنا واخد ثلاث أربع بطولات؟ لا الخامسة فين؟ لا الأهلي ماخدتهاش ليه؟ هو ده النادي الأهلي”.
وواصل: “لكن ماذا يحدث في نادي الزمالك؟ ماذا يحدث في نادي الزمالك؟ شيء غريب عجيب! المشكلة فين؟ المشكلة فين في نادي الزمالك؟ ما حدش يعرف. طب أنا هسألكم سؤال ولو حد جاوب على السؤال ده ليه عندي أنا مكافأة كبيرة: من المسؤول في اللي بيحصل دلوقتي في نادي الزمالك أو فيما يحدث في نادي الزمالك؟ نحاسب مين؟ هل هو مجلس إدارة؟ هل هو مدير رياضي؟ هل الجهاز الفني؟ هل اللعيبة؟ حد يسألني، حد يقول لي، حد يجاوبني. اللي في نادي الزمالك واللي بيحصل ده، مين يتحمل المسؤولية؟ لما أحب أكلم حد في نادي الزمالك، أكلم مين في نادي الزمالك؟”.
وأردف: “حد يقول لي سيادتك دلوقتي لما أحب أخاطب حد في نادي الزمالك وأكلمه، أكلم مين في نادي الزمالك؟ مين هيرد عليا؟ مين هيقول لي أنا المسؤول؟ لو حد عنده الإجابة دي، ليه مني مكافأة كبيرة. نادي الزمالك ده نادي كبير، نادي عظيم، لكن تعال دلوقتي أكلم مين في نادي الزمالك؟ أقول لمين أنت المسؤول في نادي الزمالك؟ ما فيش الإجابة، ما فيش الإجابة، ما فيش، فيه نعم، فيه لا، الإجابة ما فيش. حرام عليكم جمهور نادي الزمالك بجد يعني، ده أوفى جمهور، حرام عليكم انتوا بتعملوا في جماهير نادي الزمالك ليه كده؟ هو أنا عايز أعرف حاجة هو انتوا ليه تخصصتوا في زعل جماهير نادي الزمالك كده؟ هو انتوا ليه يعني، يعني فاكرين فيه جوائز إن أنتم تزعلوا جماهير نادي الزمالك؟”.
واستكمل: “ليه أنا بقول كده؟ لأن هقول لحضرتك ليه أنا بقول كده. حد يجاوبني برضه على السؤال ده وليه عندي مكافأة: هي المشكلة في نادي الزمالك إيه؟ فلوس؟ ولا سوء إدارة؟ ولا نرمي الشماعات؟ ولا أرض أكتوبر؟ المشكلة فين في نادي الزمالك؟ حد يقول لي. أنت بداخل نادي الزمالك الشماعات موجودة، شماعة اتنين تلاتة، شماعات موجودة من قبل ما تبدأ، الشماعات موجودة. الأزمة المالية، الأزمة المادية، الأزمة المالية، الأزمة المادية. آه طيب، تعالوا نشوف الأزمة المالية في نادي الزمالك. انزل لي بـ “إسكواد” نادي الزمالك سيادتك السنة دي”.
وأشار: “صفقات: مهدي سليمان انتقال حر، شيكوبانزا وعندك 800 ألف دولار ولا يورو، وحضرة عمرو ناصر 867 ألف دول وحضرة، احسبوا معايا، كله يجيب الآلة الحاسبة، كله يسيب اللي في إيده، هاتوا الآلة الحاسبة واحسبوا معايا الأزمة المادية في نادي الزمالك أخبارها إيه. عمرو ناصر فاركو، عمرو ناصر 867 ألف دولار ولا يورو، عمرو ناصر باليورو ما يعادل يعني أوكيه، يبقى ما يعادل يعني حوالي كام عمرو ناصر؟ 40 مليون، تمام كده؟ تقريبًا عمرو ناصر 40 مليون، تمام. أحمد شريف 600 ألف يورو الله أكبر، 600 و 3 كمان ماشي يا عم حسني حقك عليا. طيب، آدم كاييـد انتقال حر يعني هو ياخد فلوس. عبد الحميد معالي 500 ألف يورو. معلش يا جماعة أنا بتكلم مش أنا مش منفعل ولا حاجة بس أنا بظهر لكم ما هي الأزمة المادية في نادي الزمالك. نادي الزمالك ما فيهوش فلوس يا جماعة؟ نادي الزمالك ما فيش فلوس؟ اهو عبد الحميد معالي 500 ألف، أمال دول إيه؟ ورق كوتشينة؟ أحمد ربيع 630، محمد إسماعيل 868 ألف يورو دي ماشي صفقة كويسة. إعداية الدباغ 350 ألف يورو. خوان إلفينا مليون و 800 ألف يورو. كام بقى الإجمالي؟ الإجمالي كام؟ تحسبوه ولا لا؟ احسبوها 7 مليون و 300 ألف يورو. الزمالك في أزمة مادية كبيرة جدًا؟ الزمالك ما فيش فلوس؟”.
واستكمل: “هل دي أزمة مادية لسوء اختيار؟ طيب، هل أنا استفدت بآدم كاييـد؟ لا. استفدت بإعداية الدباغ؟ عمرو ناصر؟ لا. أحمد شريف؟ لا. مين تاني؟ معالي؟ لا. شيكوبانزا؟ لا إثنين. ما فيش غير خوان إلفينا ومحمد إسماعيل. عرفتوا بقى الأزمة المادية جامدة قوي في نادي الزمالك إزاي؟ طب نادي الزمالك دفع إيه غرامات؟ ممكن تجيبوا لي نادي الزمالك دفع إيه غرامات؟ تعالوا، نادي الزمالك دفع في شيكابالا 517 دفعة عهد المجلس و 800 دولار، سامسون كينولا 512 ألف، سامسون 24 ألف، مساعدي جوسفالدو فيريرا 83 ألف. أدي الأزمات، ما فيش فلوس! ما كل دي فلوس. اللي بعده يلا. أشانبونج 340، خالد بوطيب 2 مليون، أحمد بالحاج 46 ألف، غرامات الاتحاد الدولي 68 ألف، كل ده الدفع. باتشيكو مليون. المجموع 6 مليون دولار و 522 ألف”.
وأردف: “فين الأزمة المادية؟ الأزمة في الإدارة، مش في الفلوس. الأزمة في الإدارة، مش في الفلوس. طيب، عندك 6 مليون و 7 مليون دخلنا في 13 مليون. ده مش أنا مش جايب الأرقام دي من البيت عندي، ده مش بالمصري، 13 مليون احسبها، احسبوها لي كده بكام؟ 13 مليون، قلنا 10 مليون، قول بنص مليار، نص مليار، وفي عندك هنقعد كتير نحسب، لا يعني حوالي بتتكلم في 600، 700 مليون جنيه. هو ده بقى الزمالك اللي عنده أزمة مادية؟ هو ده حضرتك. زيزو بيلعب في الأهلي، إمام عاشور بيلعب في الأهلي، بن شرقي بيلعب في الأهلي، دول بتوعك حضرتك”.
واختتم: “اللي عامل الهدف الأولاني بن شرقي أسيست، زيزو أسيست البن شرقي. يعني صفقتين. يا فرحتك يا زمالك. وغير إمام اللي كان بيتفرج على الماتش، لو كان نزل كان عمل له حاجة، رخم كان كسر الدنيا. ما فيش فلوس؟ لا في فلوس. ما فيش فلوس؟ لا في فلوس. في فلوس كتير على الزمالك، اللي بيحصل ده كتير وكتير على جماهير نادي الزمالك بجد والله. والفروقات مش بعيدة، الفروقات كلها قريبة، لكن بجد لما عاوز أكلم حد في نادي الزمالك، أكلم مين؟ حد يرد عليا”.
