شهد برنامج “اللعيب” على قناة “mbc masr” حوارًا شهد حديثًا مطولًا بين الإعلامي مهيب عبد الهادي ومحمد يوسف مدير الكرة بالنادي الأهلي، حول ملف التعاقدات وتجديد عقود اللاعبين داخل “القلعة الحمرا”.
وقال مهيب عبد الهادي خلال الحلقة: “الموضوع بقى صعب جدًا في الأهلي، وصدمت إنك لما تيجي تتفاوض مع لاعب علشان تمدد أو تجدد عقده تلاقي إن الملف بقى معقد بالشكل ده”.
ورد محمد يوسف مؤكدًا أن الصورة المتداولة غير دقيقة، حيث قال: “لا بص هو مش صعب ولا حاجة. إحنا في النادي الأهلي عندنا أسس معروفة جدًا في أي فرقة بتبحث عن البطولات والألقاب. جزء كبير من التفاوض ومحور الكلام بيكون على تحقيق البطولات، وده اللي بيهمنا”.
وتابع: “النادي الأهلي حتى لو وصل للنهائي وما كسبش بنعتبر إن البطولة خلاص اتنسيت، لأننا بنحسب الألقاب بس. وبالتالي وإحنا بنتفاوض لازم نفهم إن اللاعبين مش كلهم زي بعض. في مهاجم وهداف، وفي مدافع، وفي لاعب سكواد، وفي لاعب أساسي في الهيكل… أنواع مختلفة وقدرات مختلفة، وبالتالي ما ينفعش الأرقام تبقى واحدة”.
وأضاف: “إحنا كإدارة كورة بنصنّف ده كويس جدًا، وكل لاعب له فترة تعاقد ومعطيات بتحدد تجديده، سواء مستوى، عدد مباريات أو عطاؤه. وإحنا كنادي بنقدّر ده”.
وعاد مهيب عبد الهادي ليطرح تساؤلًا مباشرًا حول قيمة عقود بعض اللاعبين، قائلاً: “هل فلوس زيزو صعّبت الأمور شوية؟ الفلوس الكتير بتاعة زيزو خلت التفاوض مع باقي اللاعبين بقى تقيل؟”.
لكن محمد يوسف نفى الأمر تمامًا، وقال: “لا لا، مفيش أي حاجة تقيلة. في أرقام بتتداول على السوشيال ميديا مش صحيحة”.
وتابع موضحًا: “زيزو جاي انتقال حر، ما تفاوضناش مع نادي وما دفعناش فلوس. وملف تقييم اللاعب بيشمل حاجات كتير: عمره، عطاؤه، وجوده في المنتخب… معايير كثيرة جدًا”.
واختتم تصريحاته قائلاً: “فريق الأهلي عنده التزام وانضباط عالي جدًا، وهدفنا هو البطولات والفوز بالبطولات، وده معيارنا الأساسي في أي تفاوض”.
