أكد ييس توروب، المدير الفني للنادي الأهلي، خلال المؤتمر الصحفي الذي عُقد قبل مواجهة سيراميكا كليوباترا في نصف نهائي كأس السوبر المصري المقام في الإمارات، أن الفريق جاهز لخوض المباراة بطموح كبير لتحقيق الفوز والوصول إلى النهائي، مشيرًا إلى أن الدفاع القوي هو أساس الفوز بالبطولات.
وقال توروب في بداية حديثه: “أهلاً بكم، دي أول مرة لي أحظى بشرف المشاركة في كأس السوبر. أنا حضرت قبل كده الإمارات، وحضرت عدة معسكرات مع فرق كنت بدربها. أتمنى تكون دي فرصة لتحقيق أول بطولة ليا مع النادي الأهلي.”
وأضاف: “أنا مش جاي أتكلم عن الماتشات السابقة، قلت بعد الماتش اللي فات إن دايمًا بتعلم من ماتش لآخر. حريص على تطوير الأداء من ماتش للتاني، ودايمًا بتطلع للخطوة اللي جاية. أنا حاطط نصب عيني الفوز في الماتش الجاي والوصول للنهائي بإذن الله.”
وتحدث المدير الفني عن حالة الثنائي المصاب إمام عاشور ومحمد شريف، قائلًا: “إمام عاشور ومحمد شريف بيتدربوا كويس جدًا عشان يرجعوا، وعندهم رغبة كبيرة في العودة للمباريات. إمبارح كانت أول مرة يرجعوا يتمرنوا مع الفريق، والنهاردة كمان هيتمرنوا. أكيد هنشوف مستوى أدائهم وأخبارهم إيه، وإحنا منتظرينهم يرجعوا قريب إن شاء الله.”
وعن جماهير الأهلي في الإمارات قال توروب: “متطلع ومتشوق جدًا إني أشوف الجماهير بكرة في الاستاد. أتمنى يشجعوا الـ11 لاعب اللي هيلعبوا في الملعب بكل حرارة عشان نحقق الانتصار. أنا شفت جماهير الأهلي قبل كده في ماتشات سابقة، لكن متطلع بكرة أشوف الجماهير اللي هتحضر هنا في الإمارات ومنتظرهم بفارغ الصبر.”
وأوضح المدير الفني للفريق رؤيته الفنية قائلًا: “الهجوم بيحقق الفوز في المباريات، لكن الدفاع الجيد هو اللي بيحقق الألقاب. دايمًا بشتغل على الدفاع وأدائه وتحقيق التماسك الدفاعي للفريق. كل ما نبقى أقوى في الدفاع ومندخلش فينا أهداف، ده أكيد بيساعدنا على تحقيق الفوز.”
وتابع حديثه: “بنشتغل على الجانب الهجومي، لكن الجانب الدفاعي مهم جدًا بالنسبة لنا وبنركز عليه. طول ما إحنا ما بيدخلش فينا أهداف، فرصتنا دايمًا أكبر في الفوز.”
واختتم توروب تصريحاته بالإشارة إلى أداء الفريق في المباراة السابقة، قائلًا: “في الماتش اللي فات عملنا 21 محاولة على المرمى، والمصري عمل محاولة واحدة بس، وده مثال بيوضح قد إيه إحنا مركزين دفاعيًا وبنشتغل هجوميًا في نفس الوقت. صحيح إننا كنا محتاجين نسجل أهداف، لكن شغالين على ده عشان نحل مشكلة التسجيل ونكمل التطوير في الأداء.”
