أكد الإعلامي عمرو أديب أن موضوع أرض الزمالك في حدائق أكتوبر انتهى وأصبح من المستحيل عودتها بعد بيان النيابه العامة بشأنها.
وقال أديب، خلال تصريحات تليفزيونية ببرنامج “الحكاية” عبر قناة “ام بي سي مصر”:” اللي أنا فاهمه إن خلاص الأرض بتاعه اكتوبر دي انتهت ومبقتش موجوده وبقالي كام يوم بقول إحساسي كده، كده خلاص مفيش أرض اكتوبر تاني لنادي الزمالك ده نمرة واحد”.
وأردف: “كل الجهات اللي اشترت في أرض الزمالك دي جهات رسميه يعني أموال الدولة .. فالناس دي فلوسها راحت فين .. في بنوك كبيرة وجهات رسمية دفعت فلوس .. فلوسهم هترجع ازاي طيب” .
وتابع أديب: “دلوقتي لما المشروع كله يتلغي كده خلاص .. الفلوس دي هترجع دلوقتي إزاي فكده كأنها أموال مجمدة، إحنا في وضع سئ للاسف .. كده الأرض ضاعت وكده مفيش أرض ده حاجه شبه مؤكدة”
وأشار: “الحديث عن الأرض البديلة.. لازم تكون موجوده وتقولوا للناس الأرض اهيه تعالوا اشتغلوا يلا علشان ترجعوا الفلوس اللي ادفعت .. الأراضي دي ملك النادي وليس مجلس إدارة الزمالك”
وواصل:” رسالتي لمجلس إدارة نادي الزمالك اتعاملوا مع الأمر الواقع، الأرض راحت خلاص، روحوا شوفوا الأرض الثانية فين مكانها وهتعملوا ايه، لان تحقيقات النيابة يعني الأمر ده يعتبر معلق فتره لحين صدور قرار بشأن الأموال دي ادفعت امتى وازاي والموافقات تمت امتى وازاي”.
وأكمل أديب:” الأمر بيتأزم لان ممكن خلال ساعات تلاقي المجلس مطلع بيان بالاستقالة والدعوة لانتخابات مبكره .. هيقولك أنا هتحقق معايا وهيحصل وهيحصل طيب ليه كل الامور دي يا جماعه”.
وأختتم: “احنا بنتكلم على انهيارات ورا بعض بقى ..لو جيه بكره كابتن حسين لبيب واللي معاه قالوا احنا مستقلين خلاص .. لمصلحة مين ده كله، لمصلحة مين الكيان ده كله يقع .. لازم حلول سريعة لحل الأزمة من كل الجهات لان العواقب هتبقى سيئة، لازم أعلى المصلحة العليا فوراً”.
