علق أيمن يونس، نجم الزمالك السابق، على أوضاع الفريق الأول لكرة القدم بالفارس الأبيض، خاصة بعد الخسارة أمام سموحة في كأس عاصمة مصر.
وقال يونس، خلال مداخلة هاتفية عبر برنامج “زملكاوي” على قناة نادي “الزمالك”:” مش هتقولي أنا إنت مش موجوع على أداء فرقة الزمالك؟ طيب مش زعلان؟ طيب إنت مش زعلان؟”.
ليرد محمد ابو العلا مقدم البرنامج: ” طبعاً كلنا زعلانين، بس أنا مش عايز أقسو قوي عشان عندنا ماتش مهم بعد بكرة في كأس مصر مفهوش تعويض ”
ليعود يونس ويقول:” إحنا بندرس إحنا فين، إحنا بنعرف إحنا فين، هل عندك ناشئين مميزين ظهروا؟ أم هل عندك لعيبة بيقعدوا على دكة البدلاء ظهروا؟ هل عندك لعيبة تستحق إن هي تبقى موجودة ظهرت؟ إحنا بنكتشف نفسنا وبنشوف نفسنا صح أو غلط”.
وتابع:” أنا ضد الناس إنها بتقول إن دي هزيمة، لا.. إحنا بنعرف ببطولة، مش ودية طبعاً لكن هي مش أكتر من تجارب .. يعني إحنا مشكورين جداً إن بيعملوا بطولة الرابطة لأن هي ليها إفادات كتيرة قوي”.
وشدد يونس:” إحنا بنستفيد مين ينفع ومين ما ينفعش، مين يكمل ومين ما يكملش، مين نفكر في المستقبل معاه أو مين ما نفكرش. قطاع الناشئين بيقدم لنا إيه؟ المباريات مليانة أسئلة والنتائج أحياناً بتجاوب، يعني إنتوا ماشيين صح ولا.. إحنا في ضهر نادينا وعلى الحلوة والمرة وده جمهورنا كده كمان”.
ومن جانبه تساءل محمد ابو العلا: “مطلوب إيه ماتش بعد بكرة؟ كان عندي ماتش الخميس اللي فات وجربت وشفت وقست اللي أنا عايز أقيسه، ويومين لماتش الكأس ما فيهوش تعويض”.
ليجيب يونس:” هل إنت بتتعامل على الماتش ولا إنت بتتعامل على إيه اللي بيحصل في الفرقة؟، شخصية لعيبة كتير قوي بصراحة زعلانين منها، لعيبة ناشئين كتيرة قوي كان لازم تلاقي فرصتها وتبين نفسها مشفناش، لعيبة كتيرة قوي قاعدة متذمرة ومشدودة ورافعين الياقات ومنقعدش احتياطي.. ما شفناهمش! يعني “.
وأكمل:” أنا بحيي عمر جابر وخوان بيزيرا، أحييهم لأنهم ناس عندهم أداء ثابت على طول، لكن زعلان قوي من كل أعضاء الفريق أو من كل فني بقى حتى”
وأشار يونس: “أنا ما أقدرش أقسو على مدربنا كمان لأن ظروفه صعبة، أم.. لكن أنا محتاج المباريات دي، محتاج أستعيد بيها الثقة، محتاج أجدد بيها شخصية فرقتي، محتاج أحضر نفسي للمنافسات بشكل كويس، لكن ما أخرجش منها بكم الهزايم النفسية والمعنوية والنتائج دي بالنسبة لي أنا حاجة صعبة”.
وواصل:” وأداءنا وحش بصراحة، أداءنا وحش، ودرجات تركيز اللعيبة معدومة وأنا متغاظ وزعلان الناس مبتستفدش، إحنا البطولة دي مش مهم بعد بكرة مين، إحنا البطولة دي المهم مستقبلنا هيبقى عامل إزاي مع اللعيبة دي. لأ.. أنا زعلان ولازم نعمل وقفة بجد”.
وزاد يونس:” مجلس الإدارة ظروفه صعبة والمواقف اللي عايشين فيها صعبة وبيعملوا أقصى حاجة في إمكانياتهم، وما نقدرش نقول غير إنهم بيعملوا أقصى إمكانيات”.
وأستطرد :” لكن بالنسبة لفرقة الكورة أنا زعلان، مش مستفيدين… أنا مش فارق معايا نكسب الماتش الجاي ولا لا،، ولا فارق معايا نكسب البطولة دي، مش فارق معايا مكسب وخسارة والله يا كابتن أبو العلا، لكن أنا بقولك اللي إنت بتدور عليه في البطولة ده لقيته ولا لا؟ لقيت مجموعة ناشئين مميزة ولا لا؟” .
وأكد يونس:” لقيت لعيبة قاعدة على دكة البدلاء تستحق تبقى أساسي ولا لا؟ ده سؤال مهم دي هي دي اللي إحنا بندور فيه في البطولة، إحنا وحشين! إنت الماتش اللي فات يا كابتن أبو العلا يخش لنا خمس ست جوان! واللي مش قد نادي الزمالك ما يمشي ويروح ما يزهقوناش بقى”.
وأستأنف:” ده أنا في سني دلوقتي لو نزلت أنا أموت نفسي في الملعب عنهم! أنا راجل لعبت في ملعب نادي الزمالك، وطول عمر تيشيرت الزمالك الناس كسروا وشنا وإحنا بنلعب وكملنا الماتش مع كسر في الجمجمة، مش لعيبة بتخاف على نفسها وعلى رجلها وعلى ستايلها! إيه ده؟”.
و أضاف:” اللي مش قد نادي الزمالك يمشي، اللي مش قد يتحمل تيشيرت نادي الزمالك يمشي، اللي مش قادر يفهم يعني إيه جماهير نادي الزمالك يمشي.. مع السلامة كلكم!”.
وأشار: “لازم وقفة.. اللي مش قد يعرف يحب نادي الزمالك صح يمشي، أنا مش عايز دبة تحب نادي الزمالك تأذيه، أي حد مش عارف حقيقة نادي الزمالك.. مش هيقع، ونادي الزمالك مش هينهار لأن نادي الزمالك معاه جماهير هي درع أساسي لحمايته، ومعاه نجوم قدامى كتير درع أساسي لحمايته، ومعاه وسط كتير درع أساسي لحمايته”.
وأختتم:” لكن امشوا كلكم لو هتضيعوا لي نادي الزمالك.. كله يمشي! وإحنا بصراحة بنتفرج وغضبانين وزعلانين وقلقانين والموضوع محتاج تفكير مختلف وأسلوب مختلف وطريق مختلف، لكن عمرنا ما هنسيب نادي الزمالك “.
شاهد:
