حسام حسن بعد الفوز أمام زيمبابوي: بداية المشوار دائما صعبة.. وهذه رسالتي للاعبين والجمهور

تحدث حسام حسن المدير الفني لمنتخب مصر،عن الفوز أمام زيمبابوي،،في بطولة كأس الأمم الإفريقية،،ووجه رسالة للاعبي الفراعنة والجماهير. ،

وقال حسن، في المؤتمر الصحفي بعد مباراة زيمبابوي:” الحمد لله على المكسب، ومبروك للجمهور المصري في مصر وهنا في المدرجات، طبيعي زي ما قلت قبل الماتش، بداية البطولة وأول ماتش في المجموعة من أصعب الماتشات، وهو اللي بيوصلك لهدفك للأدوار التانية، مهم جداً تحرص على مكسب أول ماتش لأنه بيفرق في بقية المجموعات”.

وأضاف:” بدأنا بفرص كتير، ومع احترامي لمنتخب زيمبابوي لكن فرصنا كانت كتيرة وأكيدة، بس كان فيه عدم تركيز شوية في الشوط الأول”.

وشدد حسن:” كان طبيعي منتخب زيمبابوي معنوياته تعلى بعد الهدف وإصراره يزيد، لكن ثقتنا في ربنا ثم في نفسنا وتركيزي على تصحيح الأخطاء بالتعليمات أو التغييرات اللي عملتها فرق كتير”.

وتابع:” السيطرة كانت موجودة طول الماتش وخاصة الشوط التاني، وبينت الفوارق وإمكانيات اللعيبة اللي معايا والطريقة اللي اشتغلنا بيها عشان نتعادل ونرجع للماتش”.

وأشار حسن: “كان عندي يقين بفضل الله إن اللعيبة هترجع، وبين الشوطين اتكلمت معاهم وما فكرتهمش خالص إننا مغلوبين، كل اللي اتكلمت فيه إننا نصحح أوضاعنا ونستغل الفرص ويكون فيه إصرار على المكسب”.

وبشأن عن تغيير إمام عاشور وإهدار الفرص؟ أكمل:” بداية المشوار دايما صعبة وكل واحد حريص يطلع بنتيجة إيجابية، زيمبابوي كانت بتتطلع لده بس إحنا كان عندنا إصرار للمكسب رغم الفرص اللي راحت، لو مستغلتش الفرص ممكن في لحظة يحصل موضوع عكسي وده اللي كنت خايف منه”.

وزاد حسن: “بالنسبة لإمام عاشور، هو مطلعش عشان كان وحش، بس أنا حريص عليه، هو راجع من مرض صعب عطل فتره، وأنا وصلت بيه لحالة مرضية في المعسكر (10-12 يوم) حسيت إن الضغوط هتزيد عليه وهو لسه راجع، فحاولت ألعب براس حربة صريح زي مصطفى محمد، وأحافظ على لعيب مهم زي إمام بإني أقلل الضغوط من عليه في وقت التأخر بهدف”.

وواصل:” التغييرات كانت إيجابية بزيزو وإبراهيم عادل، وفتوح نزل نتيجة إصابة محمد حمدي اللي كان شغال كويس، وفتوح أنا واثق فيه جداً”.

ووجه سالة للاعبين والجمهور قائلا:” قلت للعيبة إن ده درس، اللعيبة اللي بره مهمة جداً وهي اللي غيرت النتيجة، وده اللي قلته قبل البطولة إن اللي قاعد بره لازم يبقى أهم من اللي بدأ”.

وأستأنف المدير الفني:” الماتش الجاي هنزيد وهنقابل منتخب مهم (جنوب أفريقيا) وعنده إمكانيات كبيرة، مفيش منتخب سهل في البطولة، بس إحنا محضرين نفسنا للأقوى.”.

و أردف:* وأنا مغلوب كنت حاسس بجمهوري في مصر والناس اللي جت المدرجات، كنت زعلان عشانهم وعايز أرضيهم، وربنا كرمنا عشان خاطر الناس اللي بتثق فينا”.

وعن محمد صلاح وهدف الفوز، أكد حسن: “محمد صلاح دايماً لما بيكون في ظروف مع ليفربول أو غايب عن الأهداف، لما بيرجع المنتخب بنساعد بعض ونرجعه لحالته الفنية والمعنوية”.

وأختتم:” أحرازه للأهداف بيدي له ثقة بتنعكس عليه حتى لما يرجع ناديه، صلاح النهاردة فرق كتير وهو قادر يساعد الفريق، وهيكون من أهم نجوم البطولة ومؤثر جداً في نتائج منتخب مصر”.