تحدث الإعلامي خالد الغندور عن مشوار منتخب مصر المتوقع في بطولة كأس الأمم الأفريقية، كاشفًا تفاصيل طريق الفراعنة بداية من دور الـ16 وحتى الأدوار النهائية، ومؤكدًا أن جميع المواجهات المقبلة لن تكون سهلة كما يظن البعض.
وقال خالد الغندور في تصريحات عبر برنامج “الحريفة” المذاع على إذاعة “أون سبورت إف إم”: “قد يبدو للبعض إن منتخب بنين فريق متوسط، وإنه خسر من السنغال، فبالتالي المباراة تبقى سهلة، لكن في كرة القدم مفيش حاجة اسمها مباراة سهلة خالص”.
وتابع الغندور: “طريق منتخب مصر في دور الـ16 هيكون مواجهة بنين، ولو ربنا أراد وكسبنا إن شاء الله، هنلاعب بعد كده الفائز من بوركينا فاسو أو المتصدر من مجموعة كوت ديفوار والكاميرون”.
وأضاف: “يعني ممكن تلاقي نفسك في دور الثمانية بتلعب قدام الكاميرون، أو ساحل العاج صاحبة اللقب، أو حتى بوركينا فاسو اللي واجهناها قبل كده في تصفيات كأس العالم وكسبناها وتعادلنا معاها على أرضها”.
وأردف الغندور متحدثًا عن طريق نصف النهائي: “في الناحية التانية، السنغال هتلعب مع السودان، ومالي قدام تونس، واللي يكسب من المواجهتين دول هيتقابلوا في دور الثمانية، ومنهم فريق واحد بس يوصل للدور قبل النهائي”.
وأوضح: “الجانب الآخر من البطولة فيه منتخبات قوية جدًا زي المغرب ونيجيريا والجزائر والكونغو الديمقراطية، ودي مجموعة ضرب نار بكل المقاييس”.
وعن توقيت مباريات منتخب مصر، قال الغندور: “دور الـ16 هيبدأ يوم السبت الجاي، ومصر هتلعب في اليوم الثالث، وده شيء إيجابي لأنه بيدينا راحة إضافية”.
واستكمل: “معظم لاعيبة منتخب مصر الأساسيين فوق سن الـ30، زي محمد الشناوي، محمد صلاح، ياسر إبراهيم، رامي ربيعة، محمد هاني، زيزو، وتريزيجيه، والراحة مهمة جدًا ليهم عشان يدخلوا مباراة بنين وهم فريش”.
واختتم خالد الغندور تصريحاته قائلًا: “منتخب بنين فريق قوي بدنيًا، وعنده عناصر كويسة، وقدم تصفيات ممتازة، وبالتالي المواجهة محتاجة تركيز كامل، وكل التوفيق لمنتخب مصر”.
