علق أحمد حسام ميدو،على تصريحات شريف الشربيني،وزير الإسكان،بشأن أرض الزمالك في أكتوبر، ووجه تحذير لمجلس إدارة الفارس الأبيض.
وقال ميدو، خلال تصريحات تليفزيونية عبر برنامج “اوضة اللبس” على قناة “النهار”:” الزمالك بيعيش مأساة حقيقية عمره ما شافها طول تاريخه، محدش قرب من ارض اكتوبر إلا لما الزمالك بدأ يشتغل فيها فعلياً وتكون مصدر دخل قوي ليه”.
وأضاف:” علشان كده يطالب الكل بأنه يتحد خلف الزمالك في الوقت الحساس، مختلف ولا متفق مع الإدارة.. لازم تكون خلف ناديك دلوقتي”.
وشدد ميدو:” معالي وزير الإسكان المهندس شريف الشربيني لمح إمبارح أن الأرض مش راجعه بقوله في حلول بديله، واضح جدا أن إجراءات نادي الزمالك سليمة في الأرض وخد كل الخطوات بشكل سليم سواء في الموافقات أو الرسومات أو مدة التنفيذ”.
وأشار:” ايه اللي جد علشان يحصل كده؟، أنا بقول لمجلس إدارة الزمالك بكل وضوح وصراحه لو وافقتوا أن الأرض تتسحب وارض بديله يبقى انتوا فرطتوا في حق الزمالك”.
وزاد ميدو: “انتوا ماشيين في إجراءات قانونية وده مفهوم ولكن لو قعدتوا على التربيزة ووافقتوا أن الأرض دي تنسحب ويبقى في أرض بديله يبقى في تفريط في حق الزمالك”.
و واصل:” الكلام ده مفيش اي زملكاوي يقبله.. إلا لو تخرج عليا تقولي أن السبب في سحب الأرض ان مجلس الإدارة اتخذ خطوات غير صحيحة.. لكن تقولي الخطوات كلها صحيحة وتسحب الأرض محدش هيوافق على بكده من كل جماهير الزمالك “.
وأكمل ميدو :” علشان كده بقول لازم الجمعية العمومية بكره تبقى تاريخية، ويكون فيها دعم كبير لنادي الزمالك وإنه نادي كبير لا يستهان به “.
واستأنف:” الشواهد بتقول أن الأرض دي هتتسحب.. معنى كده ايه؟ اول حاجه الملايين اللي انت صرفتها في الأرض راحت عليك ولازم تدفع الفلوس دي لرجال الأعمال تدفع ليهم”.
وأكد ميدو: “ومعناها إن الموافقات اللي الزمالك خدها بالاستثمار في الأرض مش هتجيلك تاني في قطعة الأرض الجديدة’.
وأختتم:” وتبقى نادي تبيع عضويات وده معناه ان الزمالك لو كان متأخر 10 سنين فالقرار ده هيأخره 10 سنين كمان انا بقولكم الحقيقة”.
