شوبير يُهاجم حلمي طولان بعد تبريرات الهزيمة والخروج من كأس العرب.. ويصرح: “صعبان علي لاعب واحد فقط”! فيديو
هاجم الإعلامي أحمد شوبير، مُبررات حلمي طولان المدير الفني لمنتخب مصر الثاني بعد خروجه من كأس العرب بفضيحة عدم الفوز في أي مباراة، عقب التعادل مع الكويت والإمارات ثم الخسارة بثلاثية أمام الأردن.
وقال شوبير في تصريحات عبر برنامجه الإذاعي صباح اليوم الأربعاء: “بصّوا بقى… ما تتخضّوش من دخلتي. أنا لا هزعق ولا هفعل ولا أي حاجة، أنا هاقول لكم منتخب الأردن بلعبنا النهارده ماشي.”
وتابع: “منتخب الأردن بيمثّله: نور بن عطية، سليم عبيد، علي حجبي، هادي الحروراني، محمد أبو حشيش، رجائي عايد، إبراهيم سعادة، عصام السميري، محمد أبو زريق، أحمد العرسان، وعدي الفخوري. ده اللي لعب قدامنا. وهو كان ضامن التأهل، كسب الإمارات وكسب الكويت… الإمارات 2–1 والكويت 3–1.”
وأضاف: “طب منتخبنا؟ منتخب الإمارات المباراة السابقة أمام الكويت… ركّز معايا. شوف منتخب الأردن غير كام لاعب؟ واحد؟ لأ. اتنين؟ لأ. عندك استعداد تعدّ لحد كام؟ يلا عدّ معايا… يزيد أبو ليلى، عبد الله نصيب، سعد الروسان، حسام أبو ذهب، مهند أبو طه، عامر جاموس، نزار الرشدان، أدهم القريشي، علي علوان، يزن النعيمات، محمود المردي. 11 لاعب متغيرين.”
وواصل: “جمال السلامي مدرب منتخب الأردن قال لك: أنا ضامن وهاطلع أول، وعايز أشوف الولاد التانيين وأديهم فرصة… غير 11 لاعب. ودايمًا أول ما تلاقي حارس المرمى متغيّر اعرف إن الفرقة بتلعب بالبدلاء.”
وقال: “يعني لو إحنا رايحين بمنتخب (ب)، هم رايحين بمنتخب (ت). بالتاريخ بقى… ومنتخب (ب) مصر ده مليان أسماء.”
وأضاف: “أنا بس بردّ بهدوء… 11 لاعب متغيرين. المنتخب الأردني بدأ بـ11، إلا علي علوان اللي نزل وسجل الهدف الثالث.”
وتابع: “تعالَ عشان نعرف إحنا كمان، لأنه في كلام وزيطة… والدوري وقف، وقعد ونزل وطلع… لا، بالراحة. نشوف مين اللي ما راحش عشان إيقاف الدوري والكلام ده.”
وقال: “اللاعبون اللي كانوا موجودين من البداية وتم استبعادهم لأسباب فنية: مصطفى العشّاب… محمود جاد، عصام ثروت. محمود جاد كان في بيراميدز، وكان موجود مع الشناوي. اللي لعب بسام، والاحتياطي عواد، والاحتياطي علي لطفي. وبالتالي ماعنديش مشكلة في حراسة المرمى.”
وأضاف: “المؤثّرون في بيراميدز اللي هم أساس المشكلة بقى… أي حد غير بيراميدز استبعاد فني من وجهة نظر الكابتن حلمي طولان. مين بقى؟ أحمد الشناوي كان مصاب. ومحمود جاد قلنا حارس مرمى. وعندك ثلاثة حراس: بسام، عواد، علي لطفي. فمفيش مشكلة.”
وتابع: “أحمد سامي لاعب كويس، كريم حافظ، أحمد عاطف قطة، محمود زلاكة… أربع لاعبين، منهم أساسيين: زلاكة، قطة، سامي. وجالك مروان حمدي.”
وقال: “أنا هاقول لكم كمان بالأرقام… لعبت مع تونس ماتشين: كسبت 1–0، اللي سجل قفشة وهو موجود معاك. لعبت تونس تاني كسبنا 3–0: اللي سجل يحيى زكريا موجود معاك، مصطفى سعد ميسي موجود معاك، ميدو جابر موجود معاك.”
وتابع: “معسكر سبتمبر… رحنا المغرب. خسرنا أول ماتش 2–0 من المغرب، كسبنا البحرين 4–0. اللي سجل: عمرو السولية، ميدو جابر، محمد شريف، مروان حمدي… كلهم موجودين معاك.”
وأضاف: “آخر معسكر لعبنا ماتشين مع الجزائر: كسبنا 3–1، جون في نفسهم، رجب نبيل سجل، وحسام حسن سجل. والماتش التاني انتهى صفر–صفر. إذًا حتى أهدافك اللي سجلتها كلها اللاعبين موجودين معاك.”
وقال: “أنا باتكلم بهدوء… الكابتن حلمي صديقي وحبيبي، لكني بفنّد فنيًا بس، من غير جمهور. رغم إن الكابتن حلمي قال مافيش غير الكابتن مدحت شلبي اللي واقف جنبنا… إحنا هنا داعمين ثم داعمين ثم داعمين.”
وأضاف: “أمس الحضور حوالي 56 ألف، على الأقل 40–45 ألف مصري. الرقم اتعلن على الشاشة. الجمهور لم يقصّر.”
وتابع: “قصة الإعلام والدعم… الإعلام ما بيلعبش يا كابتن حلمي. ولو هتكسب ولو في عروض كويسة هنشيلكم على راسنا.”
وقال: “اتعادلنا أول ماتش مع الكويت، وأنا بروح الكويت كل أسبوع… الناس كانت طايرة من الفرح، مش مصدقين إنهم اتعادلوا مع مصر.”
وأضاف: “الكويت أخدت نقطة منا، لكنها خسرت من الأردن 3–1، وخسرت من الإمارات 3–1. إحنا سجلنا هدفين: واحد في الإمارات وواحد في الكويت. وماسجلناش في مرمى احتياطي الأردن، مرمى الفريق الاحتياطي الثاني.”
واختتم: “أكثر واحد صعبان عليا محمد بسام… عمل بطولة كويسة، لكنه خسران ثلاثة، فالناس هتتكلم. وحد بعت لي رسالة طويلة بيقول: بسام مالوش أي لوم.. “فما هو دور الإعلام؟ نوع الهجوم إيه؟”.
