أعتذر محمد شريف لاعب منتخب مصر الثاني، على واقعة اعتراضه على التغيير خلال المباراة الماضية أمام الإمارات في بطولة كأس العرب، موضحًا حقيقة ما دار بينه وبين مدربه حلمي طولان.
وقال محمد شريف في تصريحاته خلال المؤتمر الصحفي قبل مواجهة الأردن: “الكابتن حلمي طولان مثل أبي، هو أول واحد لعبني في المكان ده. أنا بعتذر له قدام الجميع، رغم أن هو ما حصلش حاجة، بس عشان الناس برضه تبقى فاهمة هوضح الموضوع”.
وتابع: “الموضوع كله أن أنا وأنا خارج حطيت إيدي على بوقي عشان ببقى عارف أن في كاميرات كتيرة في الملعب. قلت له يا كابتن أنا كان نفسي أكمل، بس يعني كنت حاسس أن أنا قريب وأن أنا ممكن أكمل. طبعًا في مصر للأسف إحنا بنكبر كل حاجة، بنكبر المواضيع من غير ما نعرف أصلاً إيه السبب”.
وأضاف: “فأنا بوضح أن ده اللي حصل مني. كابتن حلمي قال لي: “اخرج يا شريف مش وقته.” فهي طبعًا الناس فهمت أن الكابتن أن أنا قلت حاجة خارجة وأنا ولا تربيتي ولا طبعي أن أنا أتكلم لأن الراجل ده أنا أول مرة أتكلم مع مدير فني وأنا خارج كده لأن كابتن حلمي أبويا”.
وأوضح: “فأنا بالنسبة لي لما رحت أتكلم معاه أنا من عشمي فيه بس مش أكتر. مفيش أي مشكلة خالص ولا أنا طبعي ولا سلوكي ولا تربيتي تخليني أن أنا أطلع أعترض عمري في حياتي. أنا حصل معايا مواقف أصعب من دي بكتير وكله عارفها مع المنتخب برضه، محصلش مني أي رد فعل. ده ده بخصوص الموضوع. فإحنا بنكبر المواضيع، تعالى اسأل الأول وبعد كده اكتب اللي أنت عايزه. بس فده كل توضيحي بسبب الموضوع يعني”.
ومن جانبه، علق حلمي طولان: “أولًا أنا مختار اللاعيبة ديت بعناية فائقة. الكل على مستوى أخلاقي عالي جدًا وعلى مستوى التزام عالي جدًا. بخصوص شريف، شريف ده أنا رحت نادي إنبي وكان موجود شريف كان بيلعب كجناح وغيرت مركزه، لعبته كرأس حربة وخد ثاني هداف الدوري معايا، وعشان كده النادي الأهلي بمنتهى السرعة ضم شريف كهداف ثاني للدوري”.
وأردف: “وعلاقتي بشريف وبكل لاعيبتي الحقيقة يعني علاقة علاقة أب بأبنائه، وشريف بالذات يعني علاقتي وبيا وعلاقتي بيه علاقة محترمة جدًا وعلاقة فعلًا أبوية، ولم يتجاوز شريف في حقي أبدًا”.
واختتم طولان: “هو المنظر بس قدام الناس، ده اللي آ- باخده على شريف. لكن لم يتجاوز أبدًا، ولا أسمح له بأنه يتجاوز. يعني كان هيبص يلاقي في حاجة بتحصل كده رد فعل. لكن الحمد لله علاقتنا علاقة أبوية بكل لعيبتنا الحمد لله”.
