علق حسام البدري، المدير الفني لاهلي طرابلس الليبي، على فوزه بالثلاثيه في ليبيا، وذلك بعد رحيله عن تدريب منتخب مصر
وقال البدري،خلال مداخله هاتفية عبر برنامج” اللعيب”، على قناة “ام بي سي مصر”:” بشكر الجهاز الفني واللاعبين على مجهودهم كل الموسم وتحقيق إنجاز كبير بتحقيق الثلاثية المحلية في ليبيا الدوري ثم الكأس ثم السوبر النهارده وده كرم كبير من ربنا”.
وهنا تدخل الإعلامي مهيب عبدالهادي قائلا:” والله ربنا بيردلك حقك بعد اللي حصل فيك وانك تمشي من منتخب مصر في تصفيات كأس العالم والشكل اللي حصل ده”.
ليرد البدري: “الحمدلله على كل حال متعرفشي الخير فين.. أنا وقتها كنت وصلت كأس أمم أفريقيا ولعبت تصفيات كأس العالم اول مباراة كسبت وثاني مباراة اتعادلت برا ارضي وفجاه لقيت نفسي مشيت”.
وأضاف:” بعدها موصلناش لكأس العالم، فأنت متعرفشي الخير فين، فيه اي مبرر لتقديم استقالتي لاتحاد الكرة زي ما اتردد وقولتلهم لو عايزيني امشي مشوني “.
ليعود مهيب عبدالهادي ويقول له:” لو عايز توجه نصيحة من لكابتن حسام حسن تقوله ايه ؟ ليجيب البدري:” طبعا بتمنى ليه التوفيق في كأس أمم أفريقيا وهو مدرب كبير وقادر على تحقيق نتائج بإذن الله “.
وردا على سؤال لو كنت مدير فني النادي الأهلي.. كنت هتسمح برحيل علي معلول؟ اجاب:” علي معلول لاعب كبير ومن أفصل اللاعبين اللي جم الأهلي، لكن أنا برا المشهد فأي كلام مينفعشي يتقال علشان نحافظ على قيمة علي معلول وفي أندية كبيرة دايما بتحاول تحافظ على اسم اللاعب وفي حاجات مبتطلعشي مهما مر عليها السنين”.
