حرصت نيرة الأحمر، عضو مجلس إدارة الزمالك، على طمأنة الجماهير بشأن أوضاع النادي وأزمة إيقاف القيد بالإضافة للضائقة المالية التي يمر بها،كما وجهت رسالة نارية.
وقالت الأحمر، خلال تصريحات عبر راديو الزمالك:” القضايا والحاجات اللي بتخص الزمالك سواء في كرة القدم أو الألعاب الفردية أو الألعاب الجماعية، كل ما يخص نادي الزمالك، بنحاول إننا نرد على حضراتكم ونرد على تساؤلاتكم ونطمن الجمهور وأعضاء الجمعية العمومية من الشائعات اللي بتطلع على السوشيال ميديا واللي هدفها هدم استقرار نادي الزمالك”.
وتابعت:” دايماً الزمالك كبير وعظيم وعمره ما هيقع طول ما جماهيره وولاده في ضهره بالتأكيد”.
وأضافت الأحمر:” عايزين نبدأ برسالة طمأنينة الفترة اللي فاتت أو الكام يوم اللي فاتوا كانوا عبارة عن أزمات قيد وأزمات مالية بتواجه نادي الزمالك، وده لا يخفى على أحد”.
وشددت: “الحقيقة إن كل المسؤولين داخل نادي الزمالك شغالين على الموضوع ده، وإن شاء الله كل الأمور تتحل في أقرب وقت ممكن، وبالنسبة لأزمات القيد، إن شاء الله كل حاجة في طريقها للحل بإذن الله”.
و أردفت الأحمر:” وبالنسبة لأرض أكتوبر، تاني وثالث وعاشر… أرض أكتوبر هي طوق نجاة لنادي الزمالك في المرحلة دي، ولذلك بطالب كل المسؤولين في الدولة المصرية إنهم كعادتهم يقفوا جنب نادي الزمالك زيه زي أي مؤسسة رياضية، لأن نادي الزمالك نادي ملك الدولة، فبطالب بالوصول لحل في مسألة أرض أكتوبر بإذن الله، وإن شاء الله يكون في حل قريب”.
وواصلت: “نادي الزمالك فعلاً بيمر بمرحلة صعبة جداً وشديدة جداً، ولازم الوقوف بجانب نادي الزمالك، وده الطبيعي”.
وأستأنفت الأحمر:’ مش الطبيعي إن أول ما تحصل مشكلة، الكل يدخل ويتكلم ويطلع عقد ويقول ده مزور وده فيه مشكلة، وهو كلام كله عارٍ تماماً من الصحة، يا جماعة بدل ما تدوروا ورا نادي الزمالك بالشكل ده… اقفوا جنب نادي الزمالك، ده الطبيعي”.
وأختتمت:” نادي الزمالك واحد من قطبي الرياضة المصرية، ووقوع نادي الزمالك مش هيستفيد منه حد… الكل هيخسر، وطول ما الزمالك وراه جماهيره العظيمة، عمره ما هيقع، ولاد الزمالك الوفيين، ولاعبته ومدربيه، بيمروا بالأزمة مع النادي في هدوء ومستحملين ومابيشتكوش، وما عندهمش أي مشكلة بالتأكيد”.
شاهد:
