هاني رمزي يطلق تصريح مدوي بعد فضيحة المنتخب: “آخر مرة قدمنا كرة قدم حقيقية كانت في 2010 وبعدها ماشيين بالبركة”
علق هاني رمزي، لاعب الأهلي السابق، على خروج منتخب مصر الثاني من بطولة كأس العرب 2025، مؤكدا أنه لم يكن مفاجأة بالنسبة له، الكرة المصرية تعاني من غياب تام للتخطيط.
وقال رمزي في تصريحات تليفزيونية عبر برنامج “أوضة اللبس” المذاع على “قناة النهار”:” أي منتخب بيشارك في بطولة دولية بيكون ليه أهداف واضحة، إما تجهيز عناصر جديدة أو المنافسة على اللقب، لكن ولا هدف من دول تحقق”.
و تابع: “إحنا مبنحترمش تاريخ منتخب مصر كل المنتخبات حوالينا بتتطور وبتشتغل على هويتها، بينما اللي بيحصل عندنا تدمير لشخصية اللاعب المصري، كل موسم شبه اللي قبله، وكأن مفيش حد عايز يعمل حاجة”.
وشدد رمزي:” شوف المغرب وفلسطين خصوصًا فلسطين مثال كبير على التطور رغم ظروفهم الصعبة، منتخب فلسطين بيقدم كرة قدم محترمة، بينما إحنا بنضيع الحاضر والتاريخ… وبالتالي المستقبل مبهم أي نجاح بيحصل دلوقتي بيكون بالصدفة مش بالتخطيط”.
وأردف: “آخر مرة قدمنا كرة قدم حقيقية كانت في 2010 من بعدها ماشيين بالبركة، ومقدمناش حاجة تليق باسم مصر المنتخبات الفترة الأخيرة بتقدم أسوأ صورة، وده انعكاس طبيعي لغياب أي خطط تطوير حقيقية”.
واختتم:” مفيش عندنا بنود تخطيط ولا دراسة بنمشي يوم بيوم، ومفيش أي خطة طويلة للمنتخب والكارثة إن بعد أسبوع الكل هينسى اللي حصل وهنرجع لنفس النقطة من تاني”.
