كشف المهندس هشام نصر، نائب رئيس نادي الزمالك،عن أزمات جديدة يعاني منها الفارس الأبيض بسبب سحب أرض حدائق أكتوبر.
وقال نصر، خلال مداخلة هاتفية ببرنامج “الحكاية” على قناة “ام بي سي مصر “:” بيان النهارده؟ الرسالة دي مش موجهة من مجلس إدارة نادي الزمالك بس، دي موجهة من مجلس الإدارة، وأعضاء الجمعية العمومية، وجماهير الزمالك في مصر وبره مصر، لأن الموضوع أكبر بكتير من مجرد أرض وأرض بديله”.
وشدد:” القضية مش أرض نادي الزمالك فقط، لكن عند النادي مشكلة كبيرة، وكان من الحلول الرئيسية ليها مشروع أرض 6 أكتوبر، وبعد ما خدنا موافقات من كل الجهات وبدأنا خطوات، المشروع بدأ يجيب ثماره ويحُل جزء من أزمات النادي”.
و أضاف نصر: “بناءً على الموافقات دي، أصبح على النادي ديون ومستحقات لطرفين: مستثمرين دخلوا معانا في المشروع، ومقاولين بيطالبوا بحقوقهم يومياً، والنادي مطالب بسداد هذه الالتزامات”.
واشار:” نقل الأرض من موقع مول العرب إلى حدائق أكتوبر كان تراجع في المستوى، ولو حصل نقل ثالث لمكان أبعد، أكيد هيكون أقل من المستوى، وده صعب تماماً لأن المستثمرين مش هيوافقوا، والاستشاريين اللي شغالين بقالهم سنة وليهم مستحقات هتضيع، ونبدأ المشروع من الصفر”.
وواصل نصر:” فكرة الأرض البديلة معناها إن حلم فرع الزمالك الجديد يبدأ من أول وجديد، وده غير منطقي وغير عادل للنادي ولا لجماهيره”.
و أردف: “الحل اللي قدامنا هو اللجوء لرئيس الجمهورية ومحاوله مقابلته لشرح الموقف، لأن المشكلة بقت مرتبطة بمستقبل 40 أو 50 مليون زملكاوي، ومش مجرد قرار إداري داخل نادي”.
وتابع نصر :” الزمالك حالياً بيعاني من أزمة مالية حادة، والمرتبات بتتجمع بتبرعات من أعضاء مجلس الإدارة، ولو النادي موقفش على رجله ويسدد ديونه، الأزمة هتكبر أكتر “.
ومن جانب تسائل الإعلامي عمرو أديب:” ليه الإصرار على سحب الأرض الحالية وإعطاء أرض بديلة، طالما نفس المستثمرين ونفس الموافقات ونفس القيمة؟ ليه ما نكمّلش في الأرض اللي بدأنا فيها؟”.
ليرد هشام نصر: “إحنا مش لاقين اجابه للسؤال ده يا أستاذ عمرو، إحنا ناشدنا من على منبر البرنامج فخامة الرئيس، ومستعدين نشكل لجنة من مجلس الإدارة ورموز النادي لشرح حجم المشكلة بالأرقام والتواريخ”.
وزاد:” لجأنا للقضاء، ولكل الوزارات، وشرحنا في كل القنوات إن الموضوع مش أرض بس، ده مشروع كان ممكن يكون حل عام لكل أندية مصر، وبدأ فعلاً يخفف الأزمة، لكن اللي بيحصل دلوقتي بيدخل النادي في مأزق كبير في كل الألعاب مش كرة القدم بس”.
وأكد نصر:” واضح إن التقارير اللي واصلة عن الموضوع ده مجتزأة مش واضحة تماماً. احنا مستعدين نشرح بالأرقام وبالتواريخ.
ليعود عمرو أديب قائلا: “يا بشمهندس هشام، مكاتب الرئاسة مفتوحة، ممكن يتم تشكيل وفد رسمي من مجلس الإدارة لعرض المشكلة، حتى لو لم يتم مقابلة الرئيس شخصياً، في هناك مسؤولون قادرين على الاستماع وفهم الصورة كاملة، لا اخفيك سرا، مسألتش حد على موضوع الأرض وطمني خالص… كله بيتكلم على حلول بديله زي الوطن البديل كده”.
ليختتم هشام نصر:” بكره هيتم إرسال خطاب رسمي لرئاسة الجمهورية لطلب مقابلة وشرح أبعاد المشكلة بالكامل، وليس موضوع الأرض فقط”.
شاهد:
