شوبير غاضبًا: “متقارنش نفسك بالأهلي.. أنا محروق على الزمالك أكثر من الزملكاوية”! فيديو

علّق الإعلامي أحمد شوبير بنبرة غاضبة وصريحة على حالة الجدل الدائم داخل نادي الزمالك، منتقدًا ما وصفه بالهروب المستمر من مواجهة الأزمات الحقيقية، والاعتماد على تبرير الإخفاقات بشماعات التحكيم والمؤامرات، مؤكدًا أن المشكلة أعمق من مجرد خسارة مباراة أو بطولة، وأن الحل يبدأ بالاعتراف بالأخطاء واتخاذ قرارات جريئة بعيدًا عن الخوف من رد فعل الجماهير.

وقال شوبير في تصريحات عبر برنامجه الإذاعي صباح اليوم الإثنين: “ممكن مرة واحدة بس، تقعدوا مع بعض، تقعدوا مع نفسكم، وتقولوا مشاكلنا إيه؟ واحد، اتنين، تلاتة، أربعة… يعني إيه المشكلة اللي بتحصل عندنا يا جماعة؟ فيه خوف دايمًا وأبدًا من الجمهور ومن رد فعل الجمهور، ماشي، وده موجود في الدنيا كلها، طيب وبعدين؟”.

وأضاف: “أنا عندي مرض معين، عندي مشكلة معينة، والتشخيص بتاعها باين وواضح جدًا جدًا، أروح أعمل عملية جراحية؟ عندي ورم هنا، عندي خُراج هنا، عندي مشكلة هنا، الدكتور قال لي نعمل عملية أو نفتح أو نعالج، ولا أفضل كل شوية أدور على حاجة أقنع بيها نفسي وأقنع بيها الناس؟ أخسر بطولة أقول أصل التحكيم، أخسر ماتش أقول إدارة المسابقات، أقول ظلم، ألوّح إني أسيب الدوري وأسيب كاس مصر وأسيب البطولات المحلية كلها من أولها لآخرها؟”.

وتابع شوبير: “يا جماعة الزمالك من سنة 2003 ما قربش من بطولة أفريقيا، سواء شارك أو ما شاركش، من آخر مرة كسبها على الرجاء 2002 أو 2003 بهدف تامر عبد الحميد، ما قربش من البطولة، ده كمان بسبب التحكيم؟ ما تقف مع نفسك شوية وتشوف المشاكل والأزمات اللي عندك”.

واستكمل: “الزمالك السنة اللي فاتت في أفريقيا خسر من فريق اسمه ستيلينبوش من جنوب أفريقيا، فريق الزمالك يكسبه بالاحتياطي، وخسر في القاهرة وخرج من القاهرة، ده برضه تحكيم؟ الكلام ده مش مقبول”.

وأشار قائلًا: “الماتشات الأخيرة قدام الأهلي كانت بتحكيم أجنبي، والزمالك خسر، نقول برضه تحكيم؟ أنا بجيب لك أمثلة بره، بره المحلي خالص، بعيد عن أي أعذار”.

واستطرد: “إنت لو مقتنع إن المحلي كله ظلم وتحكيم، طب بص على الأرقام، شوف عدد بطولات الأهلي في الدوري وعدد بطولات الزمالك، وبعدين تقول لي تحكيم؟ يا جماعة مش معقول”.

وتابع: “هسأل سؤال واضح: الزمالك مرة في سنة واحدة جاب 15 لاعب، وكان كسبان الدوري السنة اللي قبلها، وكان معاه مدرب اسمه فيريرا، اللي كانوا بيسموه البروفيسير، تقوم تمشي نص اللعيبة وتمشي المدرب، ده تحكيم؟ ولا ده إدارة رياضية؟ ولا إيه بالظبط؟”.

وأكمل شوبير: “مدرب عظيم واخد بطولتين ورا بعض، ولعيبة مكسره الدنيا، تروح تجيب 15 لاعب، النتيجة إن تلات تربعهم ما لعبوش، والزمالك يبدأ يخسر، واللعيبة اللي مشيت كانت أحسن من اللي قعدت، هو في إيه؟”.

واسترسل: “إنت ما بتحسبهاش كده ليه؟ حل مجالس إدارات الزمالك، والمشاكل الإدارية اللي موجودة، سببها إيه؟ مش صراعات داخل النادي؟ مش جبهات جوه النادي؟ خلينا نتكلم بأمانة، أنا محروق أكتر من زملكاوية كتير”.

وأضاف: “كل شوية تودّي الناس في حتة تانية، وتقول لهم المشكلة هناك، مع إن الحقيقة قدامنا، وبعدين تطلع أصوات محسوبة على الزمالك، يرد عليهم ناس من الأهلي، وبتوع الأهلي ناصحين، يسيبوا الموضوع يكبر والأزمة تزيد وفريقهم يكسب، طب ليه؟”.

وتابع: “ليه مثلًا السنة دي تجيب صلاح مصدق وعبد الحميد معالي والجفالي وغيرهم، وفي الآخر تقول لهم بره؟ عليك فلوس لمصدق، وعليك فلوس لمعالي، وعليك فلوس للجفالي، ولما جبت معالي قلت ده أحسن ناشئ في المغرب، والولد ما لعبش، ده ذنب مين؟ ذنب المنافس؟ ولا ذنب النظام؟ ولا ذنب اللي ما عرفش يختار؟”.

وشدد شوبير: “ما تجيش تقارن بالأهلي دلوقتي، المنافس عنده إمكانيات وعنده فلوس، وأنا أرد على موضوع الفلوس، في حد قال إن أشرف بن شرقي صفقة وحشة؟ أو فرجاني ساسي صفقة وحشة؟ محدش يقدر يقول كده، لأن اللعيبة نورت وكسرت الدنيا والزمالك استفاد وكسب بطولات”.

وأردف: “نيجي في الآخر نلوم الرعايات ونقول الأهلي بياخد أكتر، الأهلي بيكسب بطولات محلية وقارية وأفريقية، وبيشارك في كاس العالم للأندية، وعنده استقرار وما عندوش هزات، طبيعي جدًا ييجي له رعايات وفلوس، ده شيء طبيعي”.

وأوضح: “إنت عايز إيه أكتر من كده؟ ما ينفعش تفضل خايف من زعل الجمهور وتدي له مبررات وشماعات، بلاش سلاح التبرير”.

واختتم شوبير تصريحاته قائلًا: “والله العظيم ما فيش أحلى من الصراحة، قول أنا عندي مشكلة في كذا وكذا، العملية صعبة آه، بس هعملها، وهخف بعدها وربنا يكرم والدنيا تظبط وأنجح إن شاء الله، إنما طول الوقت مبررات واتهامات، ده مش هيودّي في حتة”.