كشف إبراهيم صلاح، المدرب العام لنادي الزمالك، موقف المصابين من مباراة المصري القادمة في بطولة كأس الكونفدرالية، وجديد أزمة محمود بنتايك.
وقال صلاح، خلال تصريحات تليفزيونية عبر برنامج “زملكاوي”، على قناة” الزمالك”:” الحمد لله بقالنا فترة ماشيين بشكل كويس جداً، كنا جايين في وقت صعب شوية، اللعيبة ريحت كتير لكن قدرنا نلعب المباراتين في كأس العاصمة وقدرنا نجهز بعض اللعيبة بشكل كبير جداً”.
وأضاف:” اللعيبة الدولية بدأت تيجي بقالها يومين، طبعاً باستثناء فتوح عشان الإصابة اللي عنده، لكن اللعيبة دخلت في التمارين فإحنا الحمد لله بشكل كبير بدأنا نكتمل”.
وشدد صلاح: “عندنا بعض النواقص المؤثرة جداً في التشكيل، لكن إن شاء الله شغالين إننا نقدر نحل ونشوف الطريقة الأنسب اللي نلعب بيها للمباراة، لأن المباراة طبعاً مهمة بنسبة كبيرة لينا بشكل كبير جداً. إن شاء الله نقدر نفوز ونتصدر المجموعة لأن ده وضعنا الطبيعي إن شاء الله”.
وتابع:” الأمور كلها ماشية بشكل كويس جداً، اللعيبة بدأت تعلي مستواها، وعندنا كمان أخبار كويسة إن اللعيبة المصابة بدأت تبقى موجودة معانا في التمرين، ممكن ميبقاش موجودين معانا في المباراة دي لكن هنقدر نستعملهم معانا في المباراة اللي جاية إن شاء الله”.
وبشأن إصابات عبدالله السعيد وصبحي ودونجا؟:” الحمد لله بدأوا ينزلوا واحدة واحدة لكن صعب جداً إنهم يكونوا موجودين معانا في المباراة لأنهم لسه نازلين الملعب، لكن الحمد لله إن وجودهم وبدأوا يشتغلوا على الناحية البدنية بشكل كبير لأنهم قعدوا فترة طويلة، لكن أنت بتطمن إنهم موجودين معاك في الملعب”.
وأكمل صلاح:” بعد المباراة أعتقد إن معظم اللعيبة هتكون موجودة معانا، إصابة فتوح هي اللي لسه شوية عشان هو لسه راجع من المنتخب مصاب، وعمر جابر نفس الكلام ممكن ميلحقش المباراة لكن بعد كدة إن شاء الله يكون موجود معانا، فبإذن الله بعد المباراة دي أعتقد إن العناصر هتكتمل بشكل كبير جداً يعني”.
وبخصوص اللاعب بنتايك؟ أكد صلاح:* هو لسه مش موجود معانا لكن الناس طمنتنا إن إن شاء الله الموضوع محلول بإذن الله ويكون موجود معانا، وأعتقد هيبقى إضافة قوية، إحنا حالياً بنحاول نحل على قد ما نقدر إننا نشوف حد يكون موجود يحل الأزمة دي، لكن إن شاء الله أهم حاجة في اللي جاي الاتنين يكونوا موجودين معانا، اتنين لعيبة دوليين زي بنتايك وفتوح يفرقوا مع الفرقة بشكل كبير يعني”.
