فجّر الإعلامي إبراهيم عبد الجواد مفاجأة من العيار الثقيل حول كواليس الأزمة المشتعلة داخل غرفة ملابس نادي الزمالك، كاشفاً عن حالة من “التمرد” المتبادل بين حارسي المرمى محمد عواد ومحمد صبحي، واصفاً ما يحدث بأنه سابقة لا تليق باسم وقلعة ميت عقبة.
وقال عبد الجواد، خلال تصريحات تليفزيونية ببرنامج “ملعب أون”، عبر قناة” أون سبورت”: “قصة عواد وصبحي، القصة زي ما شرحناها لكم إمبارح وقلنا لـ حضراتكم، صبحي رفض إنه يقعد احتياطي لـ عواد في ماتش المصري اللي فات في الكونفدرالية، فالنهارده حصل نفس الشيء من عواد؛ رفض يقعد لـ صبحي في الكونفدرالية.. في قصدي في ماتش بتروجيت في الدوري”.
وتابع:”طبعاً القصة دي ما ينفعش تحصل يعني، يعني معلش يعني مع كل احترام والتقدير ما ينفعش يحصل ده في أي فرقة في الدنيا خلاص، وخاصة مع فريق كبير زي الزمالك، وأنت بتلعب ماتش في الدوري والنهارده اللي قاعد الحارس الصغير محمود الشناوي.”
وشدد عبد الجواد: “لا قدر الله حصل حاجة لـ صبحي، حتى المهدي سليمان كان بيقولوا جاله شد في العضلة الخلفية تقريباً، العضلة الأمامية، حاجة كده جتله إصابة عضلية فما كانش موجود حتى على الدكة.”
وأكمل: “كابتن معتمد جمال في تصريحاته في المؤتمر الصحفي قال لك: ‘اللي أخطأ هيعاقب أياً كان هو مين بدون استثناء’، وعواد النهارده تم استبعاده لأسباب فنية ورؤية فنية من الجهاز الفني.”
وأشار عبد الجواد: ”برؤية بقى فنية، رؤية غير فنية، المشهد لا يليق بالزمالك، مصلحة الفرقة عواد يقف، صبحي يقف، أنا دي مش قصتي، قصتي إن ما ينفعش إن ده يحصل في فرقة بحجم وثقل وكبر الزمالك.”
وواصل: “”وقلت إمبارح وبكرر، الناس عايزة تمشي عواد، جون إدوارد عايز يمشي عواد، لازم يوجدوا صيغة محترمة منطقية مهذبة تليق باسم عواد، لأن عواد شئت أم أبيت واحد من الحراس الكبار، واحد من الحراس اللي لهم صيت جوه الزمالك، كان في وقت من الأوقات واحد من أهم أسباب حصول الزمالك على لقب الدوري في سنة من السنين، فانت لازم تحترمه، لكن فكرة إن أنا أطفشه أو أزقه إنه يمشي ده ما يصحش، لا مع عواد ولا مع غيره من اللعيبة.”
شاهد:
